Național Geographic fați tâmbihi ti vizitarea ali Românii
România easti unâ dit destinațiili ti cari fați tâmbihi National Geographic ti meslu brumar tu 2026.
Tașcu Lala, 30.10.2026, 11:02
Rivista „National Geographic” bâgă România tu toplu aților cama mușatili destinaţii di vacanţâ ti meslu sumedru 2026, dupâ New York, Madagascar, Argentina, Scoţia şi Egiptu/Misirii. Bâgatâ pi loclu șasi, s-fați tâmbihi ti vâsilia a noastâ, ma multu ti excursii rutieri cu spețific cultural. Di arada, lâ si bâgă oarâ a ayanghiurlor ti anami di pi Transfăgărăşan şi dit Transilvania. Uidisit cu publicația, easti meslu dit soni cându Transfăgărăşanlu easti dișcl’is ti turişțâ, iara ayanghiurli di toamnâ da niscânti di cama mușatili imaghini dit Carpaţl’i Meridionali.
„Sumedru easti meslu dit soni cându Transfăgărăşanlu, unâ geadei di vârâ 90 km ți s-duți chinghei-chinghei prit dzenurli și văl’urli a Carpaților Meridionali, easti di dip dișcl’is ti ațel’i ți vor s-lu veadâ (ti chirolu aestu di an ți armasi, el va s-hibâ urdinat mași di oi ș-di ursili cafilii). Aynanghiul easti ti miraki toamna, cându fisea anveaști strañi di chihlibari”, anyrâpseaști rivista.
Turişțâl’i suntu câlisiț s-discoapirâ Transilvania, Castellu Bran şi Bâsearica Lai di Braşov ică s-exploreadzâ mistiryioasa pâduri Hoia-Baciu, cânâscutâ ti pirmithili cu fenomeni paranormali. „Ti ațel’i ți ș-au mirachi s-pitrundâ dealihea tu isturia și cultura amplini di mistityiu ali Românii, Transilvania easti destinația nai ma uidisita. Puteț s-câlcaț pi toarili a Contilui Dracula vizitândalui cânâscutlu Castel Bran, ți ari ș-pârnoañea „Castellu al Dracula” di ispetea că ș-aduți cu castelu a vampirlui transilvănean dit ficțiuni, ninti ta s-ti duț tu câsâbălu vițin, Brașov, ta s-vedz Bâsearica Lai, un monumentu tu stil gotic” – s-aspuni nica tu articol.
“Ică puteț s-vâ duțeț pi Transfăgărășan pânâ tu apirita ali vâsilii ti unâ priimnari prit Pâdurea Hoia-Baciu, cânâscutâ ti surolu di căl’iuri montani acțidentati (oahti-groapi), poñi strânghi și pirmithi paranormali”, scrii nica National Geographic. Ta s-duchiț România ca un om ndophi, lipseaști s-mâcaț un kürtőskalács i „dulțeamea cu bicimi di buharè”, ași cum easti scos tu migdani.
România fu bâgatâ ș-tu alti clasamenti și listi thamâ adrati di National Geographic, ți angreacâ ma multu pi conservari/țâneari, ecoturismu și locuri ti anami globali. Tu meslu marțu 2026, vâsilia a noastâ fu pi loclu 2 la scarâ mondialâ tu clasamentul ahârdzât a cama ti mirachili proiecti di conservari/țâneari a fisil’ei ti cari lipseaști s-urdiñi. Rivista scoasi tu padi pidimolu multu mari ti siminarea di năi poñi tu pâduri, biodiversitatea și anchisitili di rewilding / fâțearea ayrâ diznău a locurlor (cum easti aduțerea diznău a zimbrilor). România fu spusâ ca unâ dit ațeali dit soni destinații dit Evropa cari da unâ fisi dealihea ayrâ, yii și spâstritâ.
Tut nâoarâ, Munțâl’i Făgăraș dit Carpațil’i Meridionali, cu pârnoañea „Yellowstone-lu ali Evropâ”, suntu pi loclu 2 la scarâ mondialâ tu un clasamentu adrat di rivistâ ti cama ti mirachili proiecti di conservari/țâneari a fisil’ei, hiindalui astricuț di Pâdurli di ncheari dit Ecuador. Pi hiotea a añilor, reghiuni ahoryea și scupadz dit Românii furâ selectati tu lista ti anami di cathi an Best of the World ică destinații ti cari fac tâmbihi experțâl’i National Geographic – Maramureșlu, Delta a Dunâl’ei ică Transilvania.
Autor: Danilea Budu
Apriduțearea: Mirela Biolan
