Prognoza BERD
BERD scâdzu la 1,2% prognoza di crişteari a icunumillei ali Românie ti estanu
Tașcu Lala, 04.03.2026, 23:07
Banca Evropeanâ ti Reconstrucţie şi Dezvoltari (BERD) alâxi pi scâdeari la 1,2% prognoza di crişteari ali icunumie româneascâ ti 2026, andicra di 1,6% câtu eara luyursitâ tu melsu yizmâciuñi, aspunu datili a raportului „Regional Economic Prospectsˮ, tipusitu, gioi, di instituţia finanțiarâ internaţionalâ. Uidisitu cu documentul, criştearea di estanu şi avansul di 2,2% di anlu ți yini suntu andrupâti di unâ proiectatâ cipitâ ali absorbţie a fondurlor ivropeani ditu RRF (Facilitatea di redresari şi rezilienţâ) şi fâțearea ma bunâ a zigâllei comerțialâ. Instituția finanțiarâ luyurseaști nica că câftarea di nafoarâ slabâ easti un izvuru di simasie di piriclliu di evoluţie negativâ.
Prota luyurseari ti 2025 a BERD aspunea unâ crișteari di 0,9% a Produslui di Nuntru Brutu ali Românie, ațea ți vrea s-dzâcâ unu livelu idyea cu ațelu prognozat tu meslu yizmâciuñi. „Criştearea icunomicâ armasi ñicâ tu 2025 (…). Unâ crișteari a investiţiilor finanţati ditu fonduri ivropeani și andridzearea a exporturlor di pârmâtii mutarâ ziga niheamâ andicra di slâbința a consumlui privat, tu arada ali unâ scâdeari di 5% a arudzloru dealihea tu doilu semestru a anluiˮ, s-aspuni tu unu documentu.
Banca Ivropeanâ ti Reconstrucţii şi Dezvoltari mindueaști că pistea a companiilor armâni lai, di cara s-facu mintireaji politiți ditu protlu semestru a anlui ş-a misurlor di consolidari fiscalâ bâgati tu practichie tu daua parti a anlui 2025. S-luyursea că exichea fiscalâ ayâlisi, di la 9,3% ditu Produslu di nuntru Brut, la vârâ 8% ditu PIB anlu ți tricu. Exichea va sâ scadâ la 6,2% ditu PIB tu 2026. Criştearea a TVA-lui ş-a pâhadzloru la energhie feațirâ, tu bitisita a anlui, s-creascâ rata di cathi anu ali inflaţiei la livelul di cipitâ di 9,7%, nai ma marea ditu Uniunea Ivropeanâ. Tutnâoarâ, BERD luyurseaști că Banca Naţionalâ ali Românie u țânu rata a toclui restrictivâ, ta s-dânâseascâ presiunili inflaţionisti ți s-facu dipriunâ.
Prognozili fapti di pțânu kiro ali Bancâ Țentralâ di Bucureşti, ți suntu tu raportul trimestrial tipusitu stâmâna ți tricu, scoati tu migdani că inflaţia va s-agiungă tu kirolu minduit di BNR tâș tu doilu trimestru ditu 2027. Inflaţia poati s-aibâ unâ nauâ crişteari tu doilu trimestru di estanu, cara va s-tragâ mânâ di plafonarea a pâhălui a gazilor naturali, iara, ma s-nu, poati s-ducâ ninti pi calea aesta di scâdeari lișoarâ, dzâți guvernatorlu BNR, Mugur Isărescu. El adâvgă că, ditu daua parti a vearâllei, va s-veadâ unâ scâdeari ma vârtoasâ a indițelui a pâhadzloru di consumu. Mugur Isărescu cundille, tutnâoarâ, că investiţiili publiți, maxus ditu fonduri ivropeani, lipseaști s-șadâ la thimellilu a criştearillei icunomicâ, nu alti ifculii fiscali, vahi ti 10-20 añi ş-dzâsi că easti ananghi ş-di stabilitati politicâ.
Autor: Leyla Cheamil
Apriduțearea: Mirela Biolan
