Simona Halep s-trapsi dit tenis
Agiucâtoarea românâ, ama dit pârințâ armâñi, Simona Halep, s-trapsi ufițial dit tenis
Tașcu Lala, 06.07.2026, 07:11
Liderlu mondial di ma ninti, Simona Halep, s-trapsi ufițial dit activitatea sportivâ, sâmbătâ, 13 di cirișar, la ilichia di 34 di añi, tu arada a unui evenimentu cu sâltânati andreptu la BT Arena di Cluj-Napoca (câsâbă dit ncheari-ascâpitata ali Românie), tu arada ali VII-a ediţie Sports Festival.
Evenimentul adusi arada mări leghendi a sportului românescu, prit cari Nadia Comâneci, Gheorghe Hagi (armân), Ilie Nâstase şi Virginia Ruzici, ama şi personalităţ internaţionali dit tenis, cata cum antrenorilli di ma ninti ali sportivâ, Darren Cahill şi Daniel Dobre, arbitrul Kader Nouni şi agiucâtorilli di top Elina Svitolina şi Gael Monfils.
Tu cariera a llei ti mirachi, Simona Halep fu pi prota poziție tu clasamentul mondial WTA di dauâ ori – tu 2017 și 2019. Ea ari amintatâ turneili di Grand slam di Roland Garros tu 2018 și Wimbledon tu 2019, iara tu 2014 agiucă tu ațea dit soni astrițeari di la Turneulu a Campioanilor. Fu numâsitâ Agiucâtoarea a Anlui 2018 di WTA și, tutu tu idyiul an, fu aleaptâ di ESPN cama dominantul agiucâtor di tenis a anlui tu lumi, anyrâpsitâ tu toplu The Dominant 20, nintea a altor mări sportivi di pi planetâ cata cum Novak Djokovici ică Lewis Hamilton.
La evenimentu, publiclu putu s-veadâ tuti trofeili amintati di Simona Halep tu cariera a llei. Nica ma multu, terenlu di agioc di la BT Arena fu personalizat simbolic tu dauâ buiei: veardi ti titlul di Wimbledon şi purticaliș ti ațel di Roland Garros. Cu aestâ furnie, vițeprezidentul ali Federaţie Românâ di Tenis, Daniel Dobre, âlli deadi ali sportivâ un trofeu ahoryea dit partea a forului naţional.
Dinintea ali unâ salâ para-mplinâ, Halep pitricu un mesaj di tiñie ti fañilli a llei ş-ti vâsilie: „Âlli hâristusescu ali Românie, aoa mi aflai, aoa criscui. Vâ hâristusescu dit geanlu a meu că avut pisti pi mini anda vidzui zori mariˮ, dzâsi sportiva, și s-videa că easti aputursitâ di emoţie/sinhisi. Tu arada ali galâ furâ proiectati, ti prota oarâ, caduri dit bana di familie şi dit cariera a numirlui unu mondial di ma ninti. Gala avu şi meciuri demonstrativi di simplu şi diplo, iu agiucarâ Simona Halep, Andrei Pavel, Elina Svitolina şi Gael Monfils ș-adrarâ un spectacol amplin di hazi și execuţii tehniți ti anami.
„Easti un evenimentu ahoryea, că aoa easti acâțatâ tutâ bana a mea. Aesti trofei, aeşțâ oamiñi ți mi andrupârâ totna, tamam ș-atumțea cându earam tu zori, furâ ninga mini ş-ñi deadirâ unâ energhie bunâ. Tuti cadurli ți li vidzut pi ecrani suntu bana a mea, tuţ oamiñilli cari furâ ninga mini şi, sâ ştiţ, ițido dzuuâ fu unâ dzuuâ ahoryea. Fu multu greu, ama, pân’tu soni, fu mșat.ˮ, dzâsi agiucâtoarea di tenis di ma ninti. Tu un momentu simbolic ahârdzât a yinitorlui a tenislui românescu, Halep agiucă di ndauâ ori cu topa pi teren cu unâ tinirâ agiucâtoari di Cluj-Napoca, tu ilichie di 8 añi.
Autor: Leyla Cheamil
Aprisuțearea: Mirela Biolan
