Un yeatur român tin’isit di Franţa
România Internațional, 18.10.2013, 11:46
S-amintă tu 1964 la Damasc, tu Sirii. Di zârţinâ palestinianâ, Raed Arafat vini tu Românii tu ahurhita a an’ilor 80 şi ca mulţâ alţâ tiniri araghi, apufusi s-aveanţâ carti tu Românii. Aleapsi medicina şi s-specializă tu anesteziă-terapiă intensivâ. Apufusi şi s-armânâ tu vâsâlii şi s-l’ia cetăţenia românâ. Agiunsi dapoaia s-intrâ pi ipotisili di sumsecretar, secretar di stat şi chiola di ministru al sânâtati.
La andamusea di bâgari tu aţea dit soni ipotisi, avândalui ninga el şi Biblia şi Coranul, alapsi s-şi adarâ giurâmintul maşi pi Constituţia ali Românii. Aestu român cu zârţin’i palestinieni easti multu cânâscut ti înhiinţarea a Serviciulului Mobil di Urgenţâ-Reanimare şi Descarcerari (SMURD), cari easti tu funcţiuni di cama di 20 di an’i şi pi cari l-împrustă di la an la an. Ti tut agiutorlu a lui mutrinda un ahtari serviciu medical di intervenţii iydea cu aţeali dit Uniunea Europeanâ, Raed Arafat luă nai ma nalta distincţii a statlui francez: Legiunea di Tin’ii tu grad di Cavaler. Nu s-putea s-nu îi hibâ datâ Legiunea di Tin’ii” — dzâsi ambasadorlu a Franţâl’ei tu Românii, Philippe Gustin, cari îi deadi medalia.
Greulu ţi-l tricu, curragilu, abnegaţia, corectitudinea, excelenţa, pistusinea tu unâ lumi cama bunâ şi suflitlu ţi-l bâgă tu un ahtari lucru — suntu, tuti, calităţ cari, tu minduita a ambasadorului Gustin, lipseau s-l’i-aducâ al Raed Arafat unâ ahtari turlii di premiu. Yeaturlu pricunuscu câ aestâ distincţii yini cu un bârgi nu maşi ti România, ama şi ti Europa, ca nu maşi el gol tu Românii s-împrusteadzâ, ama şi deadun cu Europa. Philippe Gustin îi ură al Raed Arafat banâ lungâ, împlinâ di urgenţi buni, pozitivi, tu servicilu a banâl’ei şi a excelenţâl’ei.
