Unâ nauâ dronâ fu surpatâ tu Românie

Unâ dronă ți intră paranom tu spaţiul aerian românescu di câtâ Republica Moldova fu surpatâ, tu noaptea di sâmbătâ câtâ dumânicâ, di un avion spaniol di avinari .

Tașcu Lala, 01.09.2026, 12:22

Unâ dronâ ți intră paranom tu spaţiul aerian românescu, di câtâ Republica Moldova viținâ, fu interceptatâ și surpatâ, tu noaptea di sâmbătâ câtâ dumânicâ, tu giuudețlu Galaţi, dit apirita ali Românie, di unâ aeronavâ F-18 a Forţilor Aeriani şi Spaţiali Spanioli, ți adra misiuni NATO di Poliţie Aerianâ Ânvârtușatâ la Baza Aerianâ Mihail Kogălniceanu (not-apiritâ). Acțiunea s-feați tu urseari cu aschirladz român’i dit țentrul di cumândâseri. Ministerlu ali Apârari Naţionalâ di București dzâsi că, dupâ xitâxeri, furâ aflati fragmenti a rachetilor interceptoari, cari furâ asparti tu condiţii di sigurami, cata cum şi fragmenti ali dronâ surpatâ tu unâ nai iu nu avea oamin’i. Cama multi dzâsi purtâtorlu di zbor a MApN, Daniel Nistor:

ʺMisiunea di xitâxeari aerianâ şi terestrâ ți s-dizvârti aclo, adratâ di unâ echipâ misticatâ dit arada a Ministerlui ali Apârari Naţionalâ şi a Ministerlui a Lucârlor di Nuntru tu naia di impactu anamisa di horli Băleni şi Cudalbi dit giudeţlu Galaţi, s-bitisi dumânicâ, anvârliga di sâhatea 16 şi 20 di minuti. Dupâ xitâxeri s-aflarâ fragmenti a rachetâl’ei interceptoari, ți furâ neutralizati tu condiţii di sigurami, cata cum și fragmenti a dronâl’ei surpatâ aestâ tahinimâ, loati di câtâ spețialişțâ.ʺ

ʺRomânia ș-apărâ spaţiul aerian, iara soțl’i a noșțâ suntu arada di noi. Vigl’earea, apandisea ntroarâ și solidaritatea a soțlor, aestea suntu asiguripseri ti securitatea a noastâ. E, România easti tu prota linie di apârari ali Uniuni Europeanâʺ – cundil’e ministrul interimar ali Apârari, Radu Miruţă. Iara ministrul interimar di Nafoarâ, Oana Ţoiu, avu unâ moabeti pi telifoni cu omologlu di Madrid, Josi Manuel Albares, a curi âl’i hâristusi că aschirladz spanioli suntu pi teritoriul ali Românie tu misiunea di Poliţie Aerianâ Ânvârtușatâ. “Lâ deadim tu șteari (…) a tâtâlor soțlor ti ințidentili fapti aoa ș-pțân chiro, âl’i hâristusirâ ali Românie ti misiunea hâirlâticâ, ama ș-aspusirâ gâilipserli ti incursiun’i ți s-fac dipriunâ tu spațiul aerian românescu. Va s-duțem ma largu lucurlu a nostu coordonat.ʺ – dzâsi Oana Ţoiu tu unâ postari pi Facebook, iu adusi aminti că Spania apândâsi unâ ș-unâ la câftarea ali Românie di anvârtușari chino a Partil’ei dit Apiritâ.

Dupâ 13 ani di la Suțata Strateghicâ anamisa di Românie şi Spanie, aesta easti noima a l’ei tu practicâ şi easti unâ cu axie ti NATO şi UE – cundil’e ministrul interimar di Nafoarâ. Ințidentul di Galați nu easti, nica, singular! Ma multi cumăț di dronâ furâ aflati, dumânicâ, tu tutu litorallu românescu la Amarea Lai, purtati di dăldzâ şi curenţâl’i vârtoși ali amari cu chimati. Tu niți un di cazuri nu s-vidzu s-aibâ bâruti.

Autor: Roxana Vasile
Apriduțearea: Mirela Biolan