Vizitâ a premierlui român tu SUA
Cu dzaţi an’i nâinti, cându eara liderlu a tiniretlui soţial-democrat român, Victor Ponta eara şi un ficior multu teribilistu. Işea tu lumi cu tricoulu cu faţa al Che Guevarra, emblemâ a stângâl’ei antiamericanâ di iuţido şi dzâţea că va s-leagâ tu lanţuri di porţâli a protâl’ei bazâ militarâ a Statilor Uniti cari va s-dişcl’idâ tu Românii.
România Internațional, 23.10.2013, 12:18
Cu dzaţi an’i nâinti, cându eara liderlu a tiniretlui soţial-democrat român, Victor Ponta eara şi un ficior multu teribilistu. Işea tu lumi cu tricoulu cu faţa al Che Guevarra, emblemâ a stângâl’ei antiamericanâ di iuţido şi dzâţea că va s-leagâ tu lanţuri di porţâli a protâl’ei bazâ militarâ a Statilor Uniti cari va s-dişcl’idâ tu Românii.
Tu anlu ţi tricu, dupu ţi majoritatea USL lu suspendă pi prezidentul Traian Băsescu şi avea nâdia ca va-l veadâ scos di pi ipotisi prit referendum, premierlu Ponta avu ma multu turlii di polemici cu emisarl’ii a Washingtonlui, cari nu s-afireau s-lu andrupascâ pi caplu a statlui. Suntu ama lucri ţi tricurâ di multu. Agiunsu la puteari, protlu ministru vru s-aratâ că fârâ s-conteadzâ culoarea a putearâl’ei politicâ di Bucureşti, Statili Uniti armân nai ma marli partener politic şi militar ali Românii. Viceprezidentul Joe Biden haristusi şi a premierlui că andrupâ România tu problemi cum suntu Afganistanlu icâ găzduirea a scutlui antirachetâ. Ei zburârâ ma multu ti ţi mutreaşti colaborarea icunumicâ. Doil’ii lideri apufusirâ că easti di mari simasii ca volumlu a investiţiilor şi a comerţului ti dauli părţâ s-creascâ. Tu un interviu dat a corespondentului Radio România, Victor Ponta exiyisi: Zborlu di partea americanâ fu: Lipseaşti s-aveţ puteari icunumicâ, s-hiţ independenţ tu ţi mutreaşti domenea energheticâ, câ ţe atunţea sigur va s-him parteneri tu ţi mutreaşti politica şi icunumia”.
Pi fondul a lucârilor ţi li au ti adrari şi companiili americane, caplu a executivlui di Bucureşti deadi asiguripseri că giustiţia românâ nu va s-mai intrâ tu alumti di turlii politicâ, iara investiţiili a lor suntu tu ghini afiriti. Victor Ponta: Dzâc: “Noi yinim s-investim, ama guvernul ali vâsâlii iu investim şi giustiţia di aclo nâ da asiguripseri ti protecţia ali investiţii”? Or, aoa ţiva nu mi ţânu în loc ta s-li dau aesti asiguripseri, că avem un sistem guvernamental cu puteari, şi aşi iţi investitor cari tin’iseaşti nomurli ali Românii şi standardili europeani easti agiutat şi afirit şi di guvernu şi di giustiţii, tu ţi mutreaşti investiţiili ţi li au”. Ama armâni tu moaubeti dosarlu a vizilor ţi li lipsescu a cetăţen’ilor ta s-intrâ tu Statili Uniti. Aestu nu easti ligat di administraţia democratâ — maşi di Leghislativlu cumândisit di republicani, şi ti aestu lucru pi agenda a premierlui furâ bâgati şi andamusi cu ma mulţâ oamin’i dit politica americanâ.
