Fără prag valoric tră abuzlu tru lucru
Camera a Deputaţlor di Bucureşti votă, ca for decizional, proiectili di alăxeari a Codurlor penal şi di proţedură penală.
Ştefan Stoica, 06.04.2023, 19:57
Alăxearea a Codurlor penal şi di procedură penală easti jalon tru cadrul Planului Naţional di Redresare şi Rezilienţă, dimi ună borgi mbărţitată di România tră păradzlli tăxiţ să-lli llia di la Uniunea Europeană. Alăxerli mutriră abuzul şi neglijenţa tru lucru. Viniti di la Senat cu căvgă, iu partidile a coaliţillei PSD — PNL — UDMR votară un prag di 250.000 di lei până la cari abuzul şi neglijenţa tru lucru nu erau lugursiti infracţiune, proiectele fură amendate sertu di deputaţ, cari eliminară iţi prag valoric.
Feaţiră aşi, acă ministerlu ali Justiţie avea pripusă, după varianta adoptată di Senat şi blamată di opoziţie şi presă, un prag multu ma scădzut, di 9.000 di lei, di la cari aţeali dauă fapte suntu incriminati. Mindueri şi xanaminduiri succesive năuntrulu a coaliţillei, taxati promptu di partidile di opoziţie, dusiră, până la urmă, la eliminarea a praglui tră abuzlu tru lucru.
Ase, uidisitu cu articolu, fapta funcţionarlui public cari nu tiñiseaşti un act pruvidzutu di un nom ică ălu tiñiseaşti cu călcarea a unei dispoziţii acăţati tru un ahtari actu normativ, di aduţi ună zñie ică ună vătămare a ndrepturlor ică a sinferurloru legitimi a unei persoane fiziţi ică juridiţi s’pidipseaşti cu hăpsanea di la 2 la 7 añi şi interdzăţearea ti exercitarea ndreptului ta s’hibă pi ună ipotisi publică. Fu eliminat, tutunăoară, şi praglu tră neglijenţa tru lucru, tru cazlu a curi sancţiunea easti ică hăpsanea di la 3 meşi la 3 añi, ică amenda.
Absenţa la iţi prag valoric poati s-aducă probleme di niconstituţionalitate. Curtea apufusi, ma ninti, că un prag valoric tră incriminarea a faptăllei easti ananghi, ahătu kiro câtu s’faţi isapi ti ună zñie adusă di fapta respectivă. Şi alăxearea a Codlui di procedură penală ari potenţialu ata să scoată tu videală controversi. Furñia easti atea că fu ţănută căbilea ti ufiliseari a interţeptărlor fapti di serviţiile specializate ca provi tru cazlu a ma multiloru infracţiuni, inclusiv tră evaziune fiscală şi aruşfeti.
Acă easti parti a coaliţillei, UDMR s-abţănu di la vot tru aestu caz. Liderlu a formaţiunillei, Kelemen Hunor, vini cu minduita că serviciile di informaţii nu au ţi căfta tru proceslu penal. Cara SRI ari un rol tru proceslu penal, numata putem să zburămu ti justiţie independentă şi nă turnămu la kirolu di aoa şi 10 añi, feaţi timbihi liderlu UDMR.
Ti aestă luyurie s’cadi s’facă un debate salami tu Parlamentu. Añi di dzăli, serviciile fură stipsiti , pi arada di tuti partidile că s-mintescu tru agioclu politic, că fac şi disfac dosare ţi pot compromite un politician ică pi altu. Iara filisearea ca probă tru proţesili di corupţie a nregistrărlor obţănute di serviţii pritu hălăţ speţifiţi riscă s’hărnească suspiciunile pi aestă temă.
Autoru: Stefan Stoica
Armânipsearea: Taşcu Lala
