Moţiuni di cenzură contra guvernului Bolojan
Protlu-ministru easti stipsitu că EXECUTIVLU ANDREADZI NAIMA MAREA KIREARI DI ACTIVI STRATEGHITI tu aesti ditu soni dauă dekenii, ”fără consultare tru coaliţie, fără debatu publicu şi fără s’aibã naima ñicã asumari politică”.
Tașcu Lala, 30.04.2026, 01:52
Moțiunea di cenzură PSD-AUR bãgatã contra executivului cumãndusitu di libearalu Ilie Bolojan fu dipusă.
Grupurli parlamentari ale PSD, AUR şi PACE Trutâi România dipusirã, marțã, la Parlamentulu di București, unã moţiune di cenzură contra guvernului cumãndusitu di premierlu libearalu Ilie Bolojan. Aesta fu simnatã di cama di 250 di parlamentari di la PSD, AUR, POT, SOS România, gruplu Pace Intâi România şi niafiliaţlli.
Angrãpsita moţiunillei cãtugurseaşti sertu politiţli iconomiţi şi administrativi pripusi di Ilie Bolojan. Protlu-ministru easti stipsitu că executivlu ndreadzi nai ma MAREA KIREARI DI ACTIVI STRATEGHITI tu aesti ditu soni dauă dekenii, ”fără consultare tru coaliţie, fără debatu publicu şi fără s’aibã naima ñicã asumari politică”.
Semnatarllii a moţiunillei nica stipsescu că tru chirolu anda româñilli duchescu cathi dzuuã scădearea a livelui di bãnaticu, premierlu ma largu nu acaţã tu isapi realitatea şi spuni cã aduţi multã hãiri cu politiţ ţI aducu ftuhie şi mintireaşi tu bana suţialã, nolgica di bãnãtorlli.
Suţial-democraţlli dimãndarã pritu unu comunicat, că numata lu-andrupãscu premierlu şi voru s’lu scoatã di pi ipotisi guvernulu pritu moţiuni di cenzură ta s’dişcllidã calea trã un executivu stabilu. Ma ninti, liderlu suţialu-democratu, Sorin Grindeanu, declara că iniţiativa PSD – AUR easti unã borgi parlamentarã tra s’creascã nãdiili di aprãftãsitã a moţiunillei.
Sorin Grindeanu: „Ari multi lucri ţi nã ampartu, ama ari un idyiulu scãpo, aţelu ti surparea a Guvernului Bolojan. Nu ari niţi nã turlie di achicãseari politicã dupu-moţiuni.”
Tu arada a lui, liderlu AUR, George Simion, sã spusi cu nãdie mutrinda adoptarea moțiunillei. George Simion: „Va s’treacã aestã moţiune fără probleme. Noi lipseaşti s’nã turnãmu la democraţie şi la proţeduri parlamentari. Aesta easti volea a popului român, nu nãscãnti parei cu a loru sinferuri cari nu s’hãrsescu di vrearea româñilor.”
Di alantã parti, prezidentulu a Senatlui, libearalu Mircea Abrudian, nãpoi spusi cã libearalli ndrupãscu ma largu premierlu Ilie Bolojan. Mircea Abrudian: „Nu ari furñii trã aestă criză politică şi guvernamentală. Ma s’treacã moţiunea, atumţea cadealihea easti borgea şi giueapea PSD şi a partiillei AUR s’pripunã unã formulă di guvernare şi s’aibã unã andrupari parlamentară tru aestã noimã.”
Nu di multu kiro, premierlu feaţi timbihi că unã surpari a guvernului tru aestu kiro aduţi hauuã icunomicã şi piriclliulu ta s’kiremu miliardi di euro ditu PNRR. Tu arada a lui, prezidentulu Nicuşor Dan, cari vru ma multi ori s’pãzãrãpseascã niakicãsearea, declarã că bãgarea unãllei moţiuni di cenzură contra a guvernului easti un sţenariu la cari s’aştipta, maca ari unã dgheafurauã anamisa di suţial-dimocraţ şi liberali. Lugurseaşti, ama, cã unu guvernu PSD-AUR easti largu ta s’hibã tu ipotisi.
Debatlu şi votlu mistico ti aestã moțiune suntu bãgati tu planu s’hibã ţãnuti marţã, tu 5 di Mailu. Tra s’treacã moțiunea di cenzură contra Guvernului Bolojan, iarapoi Executivlu s’hivã scosu di pi ipotisi, easti ananghi di unã majoritate di 233 di voturi – ditu aţelli 463 di parlamentari. PSD, AUR, POT, SOS, PACE și niafiliațllii au deadunu 281 di voturi.
Autor: Daniela Budu
Armãnipsearea: Taşcu Lala
