Piricl’ul a dronilor
Dauâ aeronavi F-16 ali Românie intrarâ pi lucru ta s-neutralizeadzâ unâ dronâ ți avea bâruti, aproapea di obiectivlu strateghic di la Neptun Deep, tu Amarea Lai.
Tașcu Lala, 01.09.2026, 12:30
Unâ dronâ marinâ cu bâruti, ți fu aflatâ fârâ direcție și silâ la mași ndauâ suti di meatri di lucrărli di la platforma energheticâ strateghicâ Neptun Deep, dusi, gioi, la anchisita ali unâ di cama susto operațiuni di securitati dizvârtiti di Românie tu Amarea Lai. Dauâ aeronavi F-16 a Forților Aeriani Români s-mutarâ di-mpadi, iara unâ di eali dișcl’isi foclu pi dronâ și u agudi. Dapoaia, unâ echipâ spețializatâ mutri cu mengâ și neutraliză acutotalui drona. Drona eara tu Zona Economicâ Exclusivâ ali Românie, la vârâ 80 di n’il’i marini apiritâ di Custanța (Constanța), și nu eara ucraineanâ – hâbări loati pritu canallu di comunicari ndreptu cu Kievul. Ințidentul easti cu ahât ma lai cu cât Neptun Deep nu easti mași unâ platformâ di extracție a gazelor, ama ș-un proiectu cu umuti mari ti securitatea energheticâ ali Românie ș-ali reghiuni. Ași, iți fuvirseari ți âl’i si fați, ari, tutnâoarâ, unâ dimensiuni strateghicâ.
Prezidentul Nicușor Dan ghinui operațiunea și lâ deadi hiritimati a aschirladzlor român’i, a piloțlor aților dauâ aeronavi F-16 și a Gardâl’ei di Coastâ, ți âl’i bâgă oarâ a dronâl’ei. Șeflu a statlui cundil’e că lucurlu di prota thesi fu afirearea a oamin’ilor di pi platformâ și țânearea a infrastructuril’ei criticâ nafoarâ di ițido piricl’u. Tu idyiul mesaj, Nicușor Dan câtâyursi susto ațea ți u numâsi criștearea a nisântor “ințidenti niminduiti” ditu partea ali Federație Aruseascâ și dzâsi că România armâni dișteaptâ, arada di soțl’i NATO, ta s-apărâ şi s-dânâseascâ iți ințudentu ți poati s-facâ pi loclu naţional.
Ș-di Bruxelles vini cușia unâ apandisi. Uniunea Evropeanâ poati s-da apandisi ayon’ia, cu unitati şi apofasi la tuti fuvirserli, deadi asiguripseri prezidenta ali Comisie Evropeană. Ursula von der Leyen dzâsi ti catastisi că easti parti dit unâ “campanie di fuvirseri ți tutu crescu”, ți ari tu naeti sâ seaminâ frixi tu evropean’i și s-ducâ la ampârțari, nuntru, tu Uniunea Evropeanâ. “Aestu easti polimlu hibrid”, dzâsi von der Leyen, zburândalui ti anvârtușarea a capațitatil’ei a evropean’ilor di curmari a cândâserilor și a preșcăvil’ei. NATO easti etimâ s-apândâseascâ, cându s-hibâ, la ițido fuvirseari ți poati s-yinâ – dzâsi ș-tu arda a lui, un ufițial ali Alianţâ.
Operațiunea ditu 20 di agustu poati s-hibâ luyursitâ un sucțes di ascheri: fuvirsearea fu dânâsitâ, platforma nu avu canâ zn’ie dip, iara oamin’il’i ți eara aclo, furâ afiriț. Ama ințidentul easti, tu idyiul chiro, un semnal di alarmâ/tâmbihi. El aspuni că România lipseaști s-hibâ-ndreaptâ, s-pruveadâ și s-dânâseascâ, s-da apandisi tu unu chiro multu șcurtu tu catastisi tu cari droni aeriani i maritimi pot s-alânceascâ aproapea di obiectivili strateghiți.
Autor: Corina Cristea
Apriduțearea: Mirela Biolan
