România, investiţii directi pi crişteari
Investiţiili directi tu economia româneascâ criscurâ, scoati tu padi INS.
Tașcu Lala, 17.09.2026, 15:48
Tu Românie, inflaţia easti pi scâdeari, ama nica easti tu un top negativ la scarâ evropeanâ, iara ritmolu di scâdeari a aluștui indicator easti ayâlisitu di pâhălu a carburanţâlor ş-a servițiilor. Ecunumia ayâlisii i u lo niheamâ tu nâpoi. Tu aestâ aradâ, datili mutrindalui investiţiili scoasi tu padi di Institutlu Naţional di Statisticâ lâ da niheamâ umuti a spețialişțâlor.
Dupâ spusa a INS, investiţiili neti fapti tu ecunumia naţionalâ furâ acutotalui di 100,5 miliardi di lei tu protlu semestrul ditu 2026, ți va s-dzâcâ vârâ 20 miliardi di evradz. Ași, dealihea, investiţiili criscurâ cu aproapea 12 proțenti ma s-adrăm biani cu protlu semestru ditu 2025. Tu doilu trimestru di estanu, ma s-adrăm biani cu doilu trimestru ditu 2025, investiţiili neti fapti tu ecunumia naţionalâ criscurâ, dealihea, cu 17,8%, di ispetea a criştearil’ei a elementilor di structurâ: lucrări di construcţii năi şi hâlăț, tamam și tropuri di urdinari.
INS dzâți că investiţiili neti suntu hărgili ti adrarea di năi tropuri fixi, dezvoltarea, modernizearea şi andridzearea a aților ți suntu tora pi lucru, cata cum și axia a servițiilor ligati di transferlu di cari pi tropurli fixi ți suntu tora pi lucru şi a terenurlor loati cu pâradz di la alti unităț i di la oamiñi, taxi notariali, comisioani, hărgi di urdinari i di manipulari. Di cara ecunumia ali Românie scâdzu tu doilu trimestru, cu 0,4%, pi seria brutâ andicra di idyiul chiro ditu 2025, traptâ nghiosu di consum, industrie și emburlâchi, investițiili și construcțiili furâ factori di andrupari şi angâsâirâ ali activitati ecunumicâ.
Construcţiili sunt, dirmi, un motor ali ecunumie, iara INS scoati tu migdani aestu lucru cu dati: numirlu a casiloru dati ti filiseari la scarâ naţional criscu, estanu, tu proțl’i şasi meși, pânâ la vârâ 32 di ñil’i, andicra di idyiul chiro ditu 2025, cându numirlu a lor eara di 24.600. Cama multili casi furâ dati ti filiseari tu câsâbadz, vârâ 60% ditu total.
Ministrul interimar a Finanţilor, Alexandru Nazare, dzâți că scupolu easti s-treacâ ecunumia di la un consum andrupât pi borgi la unâ cișteari thimil’iusitâ pi investiţii şi pâradz dealihea, ta s-amintâ ași diznău pistea a oamiñilor şi a companiilor. Uidisitu cu spusa a ministrului, România easti pi direcţia uidisitâ şi dzâți aesta cu țifri: inflaţia di cathi anu dipusi la 6,2% tu agustu, di la 8,2% tu meslu alunaru, şi cama di 10% tu cirișaru, ațea ți easti cama ayuñisita scâdeari ditu añil’i ditu soni, exichea bugetar fu cu 37% mai ñicâ tu proțl’i șapti meși di idyiul chiro ditu 2025, iara investiţiili publiți criscurâ. Tut el fați tâmbihi, ama, că inflaţia armâni ndzeanâ ș-că andridzearea a finanţilor publiți va duțeari ninti.
Autor: Ștefan Stoica
Apriduțearea: Mirela Biolan
