Di pradzl’ii a maghistraţlor
Di pradzl’ii a maghistraţlor
România Internațional, 21.08.2013, 12:07
Di pradzl’ii a maghistraţlor
Bucureşti, plenlu a Consililu Superior ali Magistraturâ apruchie pripunearea di scuteari ali pensii ayoriea ti maghistraţl’ii ţi furâ condamnaţ ti aruşfeti, ti fapti ţi au ligâturâ cu lucurlu, adrati cu şteari şi ti iţi alti infracţiun’i ţi n’icşureadzâ prestigilu a giustiţâl’ei. Nomlu va s-hibâ bâgat tu practico ti tuţ maghistraţii ţi furâ condamnaţ pânâ tora, dzâsi ministrul ali Giustiţii, Robert Cazanciuc: Dupu niscânti moaubeţ, avem îndauâ pripuneri ti turlii tehnicâ di partea a CSM-ului, ti cari va s-aibâ angâtan ministerlu şi zburâm ti tut ţi mutreaşti aesti turlii d iinfracţiun’i. Apufusim ca aestu nom, di cându va s-hibâ bâgat tu practico, va s-aplicâ şi ti aţei ţi furâ condamnaţ pânâ tora ti aruşfeti şi va ş-chearâ pensia ayoriea tu idyul chiro.”
Nu easti ici zborlu di retroactivitati a nomlui, icâ maghistraţl’ii condamnaţ nu lipseaşti s-da nâpoi pâradzl’ii luaâ pânâ tora, ama ei nu va s-mai hţrseascâ di aesti pensii. Tora, aeşţâ pâradz agiungu, tu niscânti catandisi, şi la 15-16.000 di lei, icâ vârâ 3500 di euro. Apofasea di scuteari aliştei pensii ayoriea vini dupu îndauâ niachicâseri, ancâceri tu cari furâ implicaţ maghistraţ cânâscuţ şi cari furâ condamnaţ di giustiţii. Premierlu Victor Ponta hâbârisea, nica dit 13 di Augustu, tu un interviu televizat, că Ministerlu di Giustiţii, andreapsi un proiectu di nom tu ţi mutreaşti aestâ catandisi. “Maca va-andreagâ lucârli tu magistraturâ easti multu ghini ti vâsâliea a noastrâ, Românii şi ti maghistraţl’ii ţi suntu corecţâ, cari nu di pţâni ori suntu bâgaţ deadun cu alanţâ, ca hiindalor giudicâtori icâ procurori corupţâ”, dzâsi aunţea Ponta. 90-95% dintrâ maghistraţ suntu oamin’i di aradâ, corecţâ, dzâţi Ponta, ama nu lipseaşti s-nâ fâţem că taha nu ştim că tuti contractili di restituiri di proprietăţ şi aţeali di achiziţii publiţi ţân câti trei an’i câ ţe apofasili a giudicâtorilor nu sunt idyea, s-bat cap-n cap.
Tu aeşţâ dit soni 20 di ani, giusitţia dit Românii fu totna cu problemi, iara tu aestu dit soni chiro, catandisili cu giudicâtori cu câbati di aruşfeti criscurâ. Florin Costiniu, ma ninti giudicâtor la Nalta Curti di Casaţii şi Giustiiţii, easti maşi un caz cânâscut di maghistra coruptu, tu ahurhita a anlui 2010 hiindalui condamnat câ ţe luâ 200.000 di euro ta s-da agiutor tu dosarlu a unui senator. S-avdzâ că 1,2 di milioani di euro suntu pâradzl’ii daţ ca mitâ tu aestu dit soni caz di aruşfeti andicra di cari presa dit Românii angrâpsi, icâ aţel ali unâ giudicâtoari di la Curtea di Apel Bucureşti, cari taha deadi baia agiutor tu niscânti dosari penali.
