Premiu european ti mânâstirea “Dragomirna”
Roxana Vasile, 21.03.2014, 11:38
Humor, Suceviţa, Moldoviţa, Voroneţ – tu patrimonilu mondial al Unesco, aesti mânâstiri duc alargu, tu xeani, faima ali Românii. Reghiunea dit nord-estul ali vâsâlii – Bucovina – easti unlu dit locurli nai ma urdinati di turişţâ, român’i icâ xen’i. Lâ au hari bâseariţli di aclo, ama şi imşatili picturi di nâuntru ş-di nafoarâ, pâstriti nica dit chirolu medieval. Pictati tu culori cum nu vedzi altuiuva tu lumi, ţi li poartâ ş-numa — n’irlu di Voroneţ icâ aroşu di Humor — mânăstirli dit Bucovina luineadzâ di muşuteaţâ şi dupu suti di anţi dupâ ţi furâ adrati.
Easti zborlu şi di Dragomirna, bâsearicâ ţi s-aflâ la 12 kilometri di câsâbălu Suceava. Ti calitatea a picturilor a ei murali dit naos şi altar, hiindaei adratâ tu secolu 17, Dragomirna easti unlu dit amintâtorl’ii pi 2014 a premiilor ti patrimoniu. Aesti dit soni furâ hâbârisiti Gioi, di Comisia Europeanâ şi asociaţia Europa a Nostrâ, cari promoveazâ ţânearea a patrimoniului cultural şi natural european şi a curi prezidentu easti ghinicânâscutlu tenor Placido Domingo. Cum calitatea şi muşuteaţa a picturilor di Dragomirna s-avea aspartâ tu aesţâ dit soni 400 di an’i, echipa di restaurari, di 50 di profesionişţâ şi studenţâ dit ma multi vâsâlii, avurâ ti adrari un lucru multu greu. Giuriul fu multu impresionat di profesionalismul a lor, ama şi că lucrarea fu bitisitâ multu ayoniea. Şeflu ali Direcţii ti culturâ Suceava, Aurel Buzincu, adâvgă şi el îndauâ zboarâ: Mânăstirea Dragomirna s-hârsi, tu aeşţâ dit soni an’i, di un proiectu di finanţari, anamisa di mânâstirili Moldoviţa şi Suceviţa. Un proiectu di finanţari ţi vini di partea ali Uniuni Europeanâ. Dit aeşţâ pâradz s-adrarâ ma multi lucrări, ama fu şi restauratâ pictura dit naos, unâ picturâ ti ciudii, cari, dupu lucrărli di restaurari, aratâ,, tu minduita mea, multu ghini.
Dit 160 di proiecti prezentati, maşi 27 amintarâ premiu. Dit eali, şasi va s-lia Marli Premiu şi va s-li’a câti 10.000 di euro cathi un, iara unlu va s-lia Premilu a Publicului dupu votlu pi internet ţi va lu-andreagâ Europa a Nostrâ. Decernarea a premiilor va s-hibâ pi 5 di Maiu, la Burgtheater dit Viena, sum cumândisearea a prezidentului ali Austrii, Heinz Fischer. Distincţiili va li da Androulla Vassiliou, comisarlu european ti educaţii, culturâ, multilingvismu şi tiniret, ama şi di tenorlu Placido Domingo. Patrimonilu a Europâl’ei easti unlu dit lucârli cu nai ma marli pâhă dit aţeali ţi li avem — dzâsi Comisia Europeanâ. Dupu ţi, prit programlu european “Cultura”, tu chirolu 2007-2013 s-deadirâ aproapea 40 di milioani di euro ti proiecti di patrimoniu, iara năulu program “Europa Creativâ”, cu un buget di vârâ 1,5 miliardi di euro ti yinitorl’ii şapti an’i, va s-ducâ ninti andruparea a proiectilor di cooperari întrâ vâsâlii.
