Prezidentulu ali Românie la New York
Prezidentulu ali Românie, Nicușor Dan, easti dusu dzălili aestea New York, tra s-l’ia parti la a 81-a sesiuni ali Adunari Ghenerală a Organizaţiil’ei Naţiunilor Uniti.
Tașcu Lala, 22.09.2026, 20:52
Prezidentulu ali Românie, Nicușor Dan, easti dusu dzălili aestea New York, deadunu cu alţă aproapea 130 di șefan’i di statu, tra s-lia parti la Adunarea Ghenerală a Organizațiil’ei Națiunilor Uniti. Securitatea easti tema di amprotusa ali andamasi, cu accentu pi polimlu nchisitu di Rusia tru Ucraina şi aţelu ditu Orientul di Mesi, cata cumu şi piricl’iurli mutrinda mintimineaţa artifiţială.
„Easti andamsea di cathi anu, ama cari tru aestu an cilăstăseaşti multu di multu ti zona di securitati, şi România, cadealihea, băneadză tru ună reghiuni iu ari mintireaji di securitati. Vremu s-părăstăsimu minduita ali Românie pi aestă chestiuni şi, dealihea, s-himu tru ligătură cu alţă lideri tra s-videmu cum putem s-himu tu simfunie, aţea turlie că acţiunile a noastri s-agiută ti stabilizarea reghiunil’ei”, spusi caplu a statlui.
Tru zborlu a lui ţi va-lu grească, n’iercuri, tru plenlu ali Adunari Ghenerală, aestu va s-cundil’eadză gaereţli fapti di București tră proţeslu di reformari al ONU şi contribuţia văsiliil’ei ti asiguripsearea ali irine, securitati şi arada internaţională ţi ari la thimel’iu reguli şi normi. Tru cadrulu ali andamasi ţi u avu, New York, cu secretarlu gheneralu al ONU, António Guterres, dimăndă „ahăndusita pricunuşteari” ali Românie tră activitatea aluştui ti aflarea a niscăntiloru cearei tră conflictili ditu lumi şi tră angajamentulu a lui andicra di irine, dialog şi tin’isearea a dreptului internaţionalu.
Arada di lucru a şeflui a statlui avu, tutunăoară, andamasi cu ambasadorlu american la ONU, Mike Waltz, şi cu prezidentulu a Congreslui Mondial Evreiescu, Ronald Lauder, a curi ăl’i dimăndă că România easti hăzări tra s-l’ia parti la naua parei di lucru al ONU ahărdzită ti curmarea antisemitismului. Iara a foştilor ambasadori a Statilor Uniti la Bucureşti, lă haristusi tră gaereţli mutrinda promovarea ali Românie şi tră activitatea di anvărtuşeari a ligăturăl’ei bilaterală. Adăvgă că parteneriatlu România – SUA easti ună aprăftăsită „pi lungu chiro”, andreaptă pi „thimeal’i vărtoasi”.
Di altă parti, Nicușor Dan avu muabeţ cu reprezentanţă a companiilor, bănţălor şi fondurloru di investiţii americani cari investescu tru obligaţiuni româneşti şi lă apăndăsi ti găilipserli ligatu di catandisea politică ditu România. S-andămusi și cu românil’i ditu New York a curi lă dimăndă că tin’iseaşti experienţa aţiloru cari performară tru ună suţiitati multu competitivă ta s-poată s-hibă ufilisită şi tru văsilie, cata cum și aţea că autorităţli di Bucureşti voru ună colaborari ma streasă cu diaspora. Al’i călisi s-hibă cu ună minduită tin’isită ti România şi cundil’e potenţialu pi cari lu-ari văsilia tu aestu chiro.
Luni dicseară, prezidentulu inaugură stăvrusearea di căl’iuri cu numa Văsiloan’ea Maria ali Românie, ningă sediul a Misiunil’ei Permanenti ali Românie la ONU, iu fu dizvălită și ună ploaci aniversară, cu furn’ia că s-umplură 100 di ani di la volta istorică a suveranăl’ei tru SUA. Eara dusu, tutunăoară, şi la evenimentul organizat la Atlantic Council, iu avu muabeti ti priorităţli strateghiţi tră București, respectiv infrastructura di cari văsiliua ari ananghi tru yinitorl’I an’i şi turlia pritu cari ea poati s-hibă ea finanţată.
Autoru: Daniela Budu
Armânipsearea: Taşcu Lala
