Găilipseari mutrinda păzarea ali energhie
Leyla Cheamil, 25.08.2021, 19:16
Aţeali ditu soni evoluții di pi păzarea ali energhie aducu găilipseri tru arada-a consumatorloru și maxus anamisa di aţelli vulnerabili. Datili publicati aoa şi dauă stămăñi di Institutlu Naţionalu di Statistică ditu România spuni că energhia electrică și nafta să scunchiră nai ma pţănu tu anlu ditu soni. Aşi, tru kirolu alunaru 2020 — alunaru 2021, păhadzlli la energhie electrică alinară cu 24,65%, iara la naftă cu 20,55%. Tru iarna cari yini, româñilli potu s’păltească nai cama mărli facturi la naftă ditu istorie, consecință a criştearillei cabaia mari a păhadzloru la bursă. Păhălu a naftăllei va s’agiungă pi un maximu istoricu, aţea ţi va s’ducă la criştearea a numirlui consumatorlor vulnearabili şi va u zñiipsească tută industria, spuni ună isapi a Asociaţiillei Energia Inteligentă. Simfunu cu datili, păhălu va s’hibă di 450 di dolari ñillia di metri cubi tră tuţ consumatorlli ditu văsilie.
Prezidentulu ali Asociaţie, Dumitru Chisăliţă “Nivelul di ftuhie energhetică ică raportul anamisa di păhă şi tiñia di cafi mesu va nă ducă iuva la nivelu a añilor 2010. Cara va s’făţemu ună analiză ti atea ţi s’feaţi, tru 107 añi di dzăli la consumatorlu final tru dolari echivalentu easti nai cama mari factură cari există di cându s’ufilisescu şi s’vindi nafta, tru România, ditu 1914. Piriclliurli ţi li vedu mini tru aestă oară, dimi că s’ncllidu societăţ comerciali, că tru oara anda s’ncllidu societăţli comerciale, iesu tu migdani şomerllii, şomerlli lipseaşti s’hibă păltiţ, TVA, impozitu pi amintaticu, impozitu pi sănătati, impozitu pi lucru – nu mata s’toarnă tru bugetlu di stat, dimecu el va s’hibă aguditu di aestă problemăˮ.
Ncllidearea a unei industrie dişcllidi porţăli cătră importuri, feaţi timbihi Dumitru Chisăliţă. Importurli nsimneadză deficitu di balanţă comercială, atea ţi nsimneadză multi problemi di turlie macroeconomică cari va s’iasă tu videală tru aestă zonă, adăvgă prezidentulu ali Asociaţiei Energia Inteligentă.
Tru aţea ţi ălli mutreaşti consumatorlli, ministurlu ali Energie, Virgil Popescu, spusi, tora ma ninti, că Nomlu a consumatorlui vulnerabil poati s’intră tu practico tru aestă iarnă. Actul normativ va’lli agiută cu păradz ti ngăldzari pi atelli ţi au amintatiţi ñiţ. Tu ligătură cu aestu subiectu zburără premierlu, ministurlu ali Energie, reprezentanţălli a Consiliului Concurenţăllei și ali Autoritati Națională di Reglementari tru dumenea ali Energhie, tru contextul a scuncherloru tu kirolu ditu soni la energhia electrică şi naftă. Virgil Popescu ălli căndăsi pi atelli cari nu simnară, nica, un contractu cu furnizorlu, s’aleagă nai cama bună ofertă di pe păzarea concurențială libiră, tră să s’hărsească di păhadz ma buñi. Tu arada a lui, premierlu Florin Cîţu deadi asiguripseri că Nomlu a Consumatorlui vulnerabil va s’hibă aprobatu cât cama ntrăoară tru Parlamentu. El spuni că va s’aibă ună compensari tru aestă iarnă la păhălu a facturlor, emu tră persoanili vulnearabili, emu tră alanţă consumatori.
Autoru: Leyla Cheamil
Armânipsearea: Taşcu Lala
