Hăbări di tu bana românească şi internaţională
Numirlu a morțãloru tu atacurli ţi li nkisi contra-a Israelui pareia militară palestiniană Hamas agiumsi la naima pţãnu 350 di inși, a deapoa, cama di 1.500 suntu pliguiţ. Israelu deadi unã apandasi militară tru Gaza, pritu cari vãtãmã cama di 300 di inşi
Newsroom, 08.10.2023, 21:58
ATACURI TRU ISRAELU – Numirlu a morțãloru tu atacurli ţi li nkisi contra-a Israelui pareia militară palestiniană Hamas agiumsi la naima pţãnu 350 di inși, a deapoa, cama di 1.500 suntu pliguiţ. Israelu deadi unã apandasi militară tru Gaza, pritu cari vãtãmã cama di 300 di inşi și ari pliguitã alţã 2.000. Tu kirolu anda alumtili s’ducu ninti, Israelu apufusi s’curmã darea ti energhie electrică, combustibilu și bunuri ti Cumata Gaza. Dumãnică, miliția Hezbollah ndrupãtã di Iranu aminã focuri di mortierã tu notlu a Libanlui, kiro tu cari askerili israelieani apãndãsirã cu focuri di artilerie. Parei palestinieani alumtã și tru notlu a Libanlui, acã zona easti tu mãna a milițiiloru șiite Hezbollahu. Hezbollahlu s’pirifãnseaştti cu un arsenalu, cabaia mari di racheti, cari fuvirsescu locãrli di cãtã araţili a Israelui, ama și cu alumtãtori experimentaț cari au alumtatã tru polimlu di tu Siria di partea-a prezidentului Bashar al-Assad.
ROMÂNI TRU ISRAEL — Dupu atacurli fapti, 346 di cetățeañi români și xeñi furã purtaţ tru România la bordul a dauă cursi operati di compania aeriană națională TAROM, hãbãrisi Ministerlu ti Lucri Xeani ali Românie. Parei di hãgiladz româñi suntu tu aistã oarã Tel Aviv a curi lã si deadi locãri ti durñeari și asistență cu agiutorlu a autoritățlor israelieani și ali Patriarhie Ortodoxã Românã, cari caftă cearei ta s’lli-aducã acasă. Cetăţeañilli româñi ditu Israel potu s’llia ligãtura cu Ambasada ali Românie di Tel Aviv tra sã spunã cã suntu tu reghionu, tru kirolu anda Ministerlu ti Lucri Xeani faţi urminie a duñeauãllei s’li-amânã planurli ti urdinari tu aestã vãsilie. Tru aestu kiro, Wizz Air curmã tuti azboiurli cãtã și di tu Tel Aviv ti dumãnică, hãbãrisindalui că nãpoi va li programeadzã urdinãrli/ călătoriili icã va s’da pãradzlli nãpoi și asiguripseaşti cazarea ti pasageri. Wizz Air faţi urminii a duñeauãllei tra s’llia ligãtura cu agențãlli di turismu icã s’mutreascã tu platformili online tra ş-alãxeascã biletili ţi eara rezervati. Aproapea 900 di româñi, ma mulţãlli hãgiladz, suntu tu aestu kiro tu Israel, ditu arada aluştoru, niţi unu nu easti pi halã greauã, spunu autoritățli. Sâmbătă, Bucureștiul cãtugursi sertu atacurli Hamas. Tru un comunicatu di presă, Ministerlu ti Lucri Xeani ali Românie adusi aminti ti ndreptulu suveran a Israelui tra sã s’apãrã, apufusindalui şi unã alertă di urdinari trã aestă vãsilie, cãndãsindalui româñilli s’li curmã a loru urdinãri tu aestã vãsilie icã, tru cazlu a oamiñiloru ţi suntu pi locãrli di mpadi/ pi pimintu, s’tiñiseascã instrucțiuñili dimãndati di autoritățli locali, deapoa sã s’apãnghiseascã pri tu casi și s’fugã ditu vãsilie atumţea cându catandisea easti ma bunã.
VIZITĂ – Prezidentulu ali Românie, Klaus Iohannis, ţi easti dusu tu aestu kiro ti unã vizită Portugalia, va s’andãmuseascã luni cu premierlu António Costa, cu prezidentulu ali Adunari, Augusto Santos Silva, și cu membrilli a Parlamentului. Sâmbătă, Klaus Iohannis avu muabeţ cu omologlu a lui portughezu, Marcelo Rebelo di Sousa, tu amprotusa hiindalui polimlu ditu Ucraina. Cu aestă itie, prezidentulu Iohannis haristusi ali Portugalie trã agiutorlu mutrindalui catastisea di descurageari/ di tãlleari curayilu ama şi aţea di apãrari tu arada ali NATO pi arãdãrikea ditu apiritã ali Alianțã. Prezența-a militarloru portughezi tru România easti unã spuneari vãrtoasã a solidaritatillei și ndrupãmintului ali Portugalie trã anvãrtuşearea-a securitatillei ali Românie”, spusi ufiţialu românu. Tu arada-a lui, prezidentulu di Sousa spusi că vãsilia-a lui ndrupaşti gaereţli ali Românie ti aderarea la Schengen și la OCDE.
HÂGILAKI — Adetea a hãgilãkillei ţi s’faţi cathi anu la sfindukea/ racla Sãmtãllei Parascheva a Balcañilor, unã Sãmtă majoră tru adetea ortodoxă românească, s’duţi ninti, tu cãsãbãlu Iași, di tu nordu-apirita ali Românie. Dzãţ di ñilli di hageadz di tu România și nu maş suntu aștiptaț s’facã arigeai dinintea-a loclui di cultu a Sâmtãllei Parascheva, sărbăturisită tu 14-li di Sumedru tru România.
Autoru: Udãlu a Hãbãrloru
Armânipsearea: Taşcu Lala
