Anlu de anviţămintu, fuvirsitu?

Niifharistusiţ di tiñiili di cafi mesu pi cari li lugursescu ti arizili, neise nitiñisiti, profesorlli români fuvirsescu cu greva ghenerală.

Ştefan Stoica, 17.05.2023, 16:20

Tru România, cadrele didactiţi şi personalu auxiliar ditu educaţie bitisiră aproapea tuti turliili legale di protestu, a deapoa tora au la dispoziţie maş una cali, aţea nai ma radicală: greva. Profesorlli eara ñiercuri ti prăndzu, tru ună grevă di avertismentu di dauă săhăţ şi suntu apufusiţ s’intră tru grevă ghenerală luni, 22 di mai, aşi cum apufusiră pritu unu referendum la cari apăndăsiră favorabil 70% ditu elli, cara căftărli a loru nu suntu tiñisitit. Elli vor, prota ş-prota, ca lucărlu a loru s’hibă păltitu tu simfunie cu simasia a lui suţială, nkisindalui di la principiul că tiñia di cafi mesu a profesorlui debutantu lipseaşti s’hibă nai ma pţănu isa cu tiñia di cafi mesu di mesi brută pi economie. Păltrea a tiñiiloru di cafi mesu ti tut personal didactic di predare să s’facă progresiv, tru raportu di funcţie, studii, vicllimi şi grad didactic şi să s’bagă tru practico regula indexarillei anuală a tiñiiloru di cafi mesu personalui păltit ditu fonduri publiţi cu rata inflaţiillei, suntu alti dauă căftări di pi lista-a protestatarlor. Profesorlli nica caftă păltearea a oariloru suplimentari efectuati di personalu didactic auxiliar şi nididactic şi a indemnizaţillei di instalare, acordarea a sporurilor tră condiţii di lucru a personalui ditu nviţământu, decontarea navetăllei, darea concediului di odihnă suplimentar şi compensarea financiară a concediului de odihnă neefectuat. Nu dip tu soni, cadrili didactiţi pledeadză tră creastirea anuală a investiţiilor tru nviţământu, tră făţearea ma cu hăiri baza materială şi a infrastructurăllei.

Sindicaliştii aduc aminti că ahurhiră protestile tru meslu andreu 2022 şi că eale s’dusiră ninti tu meşlli yinaru, şcurtu, marţu, apriiuru şi agiumsiră pi kipită cu marea urdinari ditu 10 di mai, di Bucureşti, la cari loară parti 15 di ñilli di oameni, ama guvernul di coaliţie armasi niminatu, iara tăxerli nu fură tiñisiti. Tinni di cafi mesu ti arizili, cădearea a putearillei di ancupărari, anomalii tru aţea ţi mutreaşti păltearea a aţiloru ţi suntu pi ipotisi di cumănduseari, suntu maş ndauă di problemele cu cari s’ampulisescu lucrătorlli ditu educaţie, spunu sindicaliştilli. Ari, tru aestă oară, un mari semnu di ntribari tu ligătură cu mira a examenelor naţionale, a evaluarillei tră admiterea la liceu şi la bacalaureatu. Liderllii sindicali admit că, ma s’nkisească greva generală, aestea suntu tu piriclliu tra s’aibă zñie. Ndridzearea a catandisillei, cundilleară năşi, ţăni orlea zorlea di apofasili ţi va ;li llia Executivlu şi Parlamentul ali Românie.

Ministrul ali Educație, Ligia Deca, ari apufusită, componenţa a pareiillei di păzărăpseari a contractului colectiv di lucru şi easti căndăsită că va s’află cearei. Nu minduescu că lipseaşti s’hibă băgati tru piriclliu niţi nă turlie structura-a anlui școlar ică proceslu educațional, spusi ministrul Deca. Ea tăxi că va s’alumtă emu ti ună pălteari a riñiiloru di cafi mesu tiñisiti ti profesori ama și tră atea că anlu școlar să s’dizvărtească tru condiții optime și să s’bitisească.

Autoru: Stefan Stoica

Armânipsearea: Taşcu Lala