Româñilli, tutu cu viză tru SUA
Programlu Visa Waiver trã români s’amână.
Tașcu Lala, 27.03.2025, 10:06
Statele Unite curmarã programlu ti scutearea-a vizãllei trã români, cari, uidisitu cu unã apofasi ali administraţi dimucratã Joe Bidin, lipsea tra s’hibã bãgatã tru practico ditu bitisita aluştui mesu. Un comunicat a Dipartamentului Securitatillei Interne, difuzat marţã şi aleptu di corespondenta Radio România tru Washington, dimãndã că acãtarea tu isapi ali Românie va s’hibã mutritã diznãu pãnã cãndu va s’hibã agiumti cãftãrli di securitate pruvidzuti tru program.
Tru aestã mutreari diznãu, Statele Unite curmã bãgarea tu lucru a sistemlui electronic di autorizare a călătoriillei trã cetăţeñilli români. Ase, cetăţenii români cari voru s’urdinã tru Statele Unite lipseaşti s’facã idyiulu lucru cumu ălu fãţea pãnã tora, ti loarea-a vizãllei „B” di non-imigrantu la ambasada icã consulatlu a Statelor Unite.
Comunicatlu a Departamentului Securitatillei Interne exighiseaşti şi aţea cã ta s’llia parti la programlu Visa Waiver lã caftã a statelor ţi au ananghi ta s’creascã cooperarea cu Statele Unite tru combãtearea-a terorismului şi a migraţillei paranomu. Tru aestu kiro, nauă vãsilii europene, di aestea Franţa, Germania, Norvegia, Slovacia ori Slovenia, ş-li bãgarã tu aradã urminiili di călăturie tru Statele Unite a cetăţeañilor a lor sumu administraţia republicană Donald Trump, ama feaţirã timbihi tru ligătură cu bãgarea tu practico a politiţlor di intrare tru vãsilie şi cu riscul a zãndanillei la sinuru.
Ministerlu român di Externe ari alãxitã, pi frãndza-a lui di internetu cãftãrli di călătorie tru Statele Unite, trã s’yilipseascã apofasea-a Washingtonlui. Diplomaţia di Bucureşti faţi timbihi a româñiloru cari au programate călătorii tru kirolu ţi yinni, nica şi dupu 31 di marţu, s’li caftã ambasadili americane ditu vãsiliili tru cari domiciliadză, ta s’llia vizili di intrari. Ministerlu nica spuni că autorităţile di Bucureşti armân tru streasă coordonari cu aţeali americane, tra si-s’asiguripseascã că programlu Visa Waiver va s’hibã bãgatu tu lucru cãtu cama ntrãoarã.
Şeflu suţial-dimucrat a guvernului di coaliţie PSD-PNL-UDMR, Marcel Ciolacu, spuni cã easti cãndãsitu că revizuirea ti bãgarea diznãu ali Românie tru program easti unã misurã tehnică şi, tu arada a lui, ari umuti cã va s’hibã ti şcurtu kiro. AUR (opoziţia naţionalistă) stipseasti guvernul ti niaxizeari şi spuni ti apofasea americanilor cã easti unu eşec arşinos a guvernarillei Ciolacu. Tut ditu opoziţie, USR yini cu minduitea ti alãxearea-a ministrului di Externe, Emil Hurezeanu.
Di pi bănţãli a putearillei, liderlu UDMR, Kelemen Hunor, cundilleadzã că tru Statele Unite, unãoarã cu agiundzearea pi ipotisi al Trump la Casa Albă, tru politica mutrinda migraţia ari unã alãxeari radicală di abordari, cari nu mutreaşti maş intrarea ali Românie tru programlu Visa Waiver. Idhea easti ambãrţitatã şi di presa românească. Aesta spuni, ama, nica ma multu cã tu pareia al Trump niţi nu ari interlocutori di pistusini anamisa di apufusitorlli politiţ di Bucureşti.
Autoru: Bogdan Matei
Armânipsearea: Taşcu Lala
