România ș-u adarâ borgea tu Schengen
Dupâ șapti meși di la apruchearea tu Schengen, România da tu șteari că s-uidisi ayoñia ș-bâgă tu practico misuri ți s-compenseadzâ xichea a controalilor fixi
Tașcu Lala, 25.08.2025, 09:34
România agiumsi vâsilie membrâ cu acutotalui ndrepturi tu aestu spațiu di libirâ urdinari ditu duñeauâ la 1 di yinaru 2025, dupâ ți Consiliul ti Justiție și Afaceri di Nuntru ditu andreu 2024 apufusi scutearea a pusputeriloru la sinurli di pisti locu cu Vâryâria ș-Ungaria (Mâgiria). Ma ninti, pusputerili la sinurli pi calea a aerlui și maritimi eara scoasi ahurhinda cu 31 si marțu 2024.
Aderarea la Schengen – unu spaţiu ți ari 29 di vâsilii membri ş-aproapea 450 di miliuni di bânâtori – agiutâ la adrarea cama aplo a câlâturiiloru, duți cama lișor alâxerli di emburlâchi și creaști lucrul turisticu a vâsililllei. La șapti di cându intră, Poliția di Sinuru Românâ da hâbari că siguranța armâni tu prota tesi și că s-uidisi ayoñea ș-bâgă tu practikie misurli ți s-adavgâ xichea a pusputeriloru fixi.
Dupâ cum dzâți unu comunicatu, easti zborlu ti unâ viglleari cu droni, autospețiali operativi, udadz cu termoviziuni, ambarcațiuni și sistemi radar ta s-monitorizadzâ sinurli. Tutnâoarâ, s-adarâ pusputeri aoa-ș-aclo, ți va s-dzâcâ aleatorii, tu zona di sinuru și pi căiurli di aproapea și lucurlu aestu s-duți ninti.
Tu ți mutreaști migrația paranomu și furlâchea, Poliția di Sinuru Română da hâbari, ti isapea a ațiloru șapti meși, ți va s-dzâcâ 110 inși suntu pusputiț penal ti trafic di migranțâ și aproapea 800 di migranțâ furâ dânâsiț s-treacâ paranomu sinurlu. Tu aeroporturi, aproapea 700.000 di pusputeri s-feațirâ ti pasagerilli intra-Schengen, filisindalui terminalili mobili eDAC. Furâ aflaț 60 di inși tu șideari paranomu, 50 di documenti falși și 40 di inși avinaț. Tutnâoarâ, 77.000 di minori români furâ pusputiț la fudzeari, iara cabaia di 200 nu umplea condițiili ligali di urdinari.
Zburândalui di lucurlu deadunu internațional, Poliția di Sinuru Românâ da hâbari ti acțiuni deadunu cu Vâryâria ș-Ungaria (Mâgiria) ti niagiundzearea la migrație paranomu, cata cumu și partițipari cu personal la sinurlu anamisa di Vâryâria și Turkia, deadunu cu soțlli ditu Afstria ș-Ungaria. Pitrițemu că tu șaptili meși a anlui, dusirâ ninti lucurlu la siguranța a sinurloru di nafoara ali UE, deadunu cu soțlli ditu vâsiliili vițini: Ungaria, Vâryâria, Sârbia, Ucraina și Republica Moldova. Furâ acutotalui 4.500 di acțiuni deadunu – di la misiuni di viglleari pânâ la ațeali ți va s-dzâcâ că filisescu tuti hâlățli ti lucru deadunu cu sinurlu di la ațeali ți va s-dzâcâ reghiuni.
Sinurli suntu tora, dupâ cum dzâți Poliției di la Sinuru, cama siyuri ș-cu hâiri, ti ațea că fu optimizatâ turlia di lucru și punctili di trițeari, ama și zonili di sinur veardi, ta s-da apandisi ayoñea a ițillei catastisi. Iara kirolu di aștiptari fu scâdzutu, fârâ sâ scadâ ama ațea ți va s-dzâcâ pusputearea.
Ca unâ isapi, Poliția di Sinuru dzâți că, tu proțlli șapti meși a anlui, România poati s-asiguripseascâ sicuritatea a sinurloru di nafoara ali Uniuni Europeanâ, bași fârâ pusputeri fixi la sinurli cu Ungarie și Vâryârie. I si uidisi multu ayoñea, deadi apandisi-ntroarâ și dusi la andruparea a cetățeañiloru și la andruparea a libirâllei urdinari – sâ spuni tu comunicatu.
Autor: Daniela Budu
Apriduțearea: Mirela Biolan
