Alidzeri locali parţiali tu Românie
17 candidaţ au umuti ti fotoliul di dimarhu gheneral a Bucureştiului la alidzerli parţiali locali dit 7 di andreu.
Tașcu Lala, 26.11.2025, 23:37
Anlu aestu lipsea s-hibâ isih dupâ maratonlu electoral ditu 2024. Curmarea, ama, a alidzerlor prezidenţiali, di itia a mintearillei xeanâ ti un candidat extremistu, mută tu 2025 alumta ti cama di simasie thesie tu crat. Independentul proivropean Nicuşor Dan inși prezidentu, iara vgarea a lui di la Primăria Gheneralâ a Bucureştiului, ți u avea amintatâ, an, ti doilu mandat arada, âlli bâgă zori a executivul s-andreagâ alidzeri ti capitalâ, aşi că maratonlu electoral dit 2024 s-teasi ș-anlu aestu.
Alidzerli ti Bucureşti va s-facâ tu 7 di andreu. Campania electoralâ ahurhi sâmbătâ tahina, 22 di brumar, ș-va s-bitiseascâ tut sâmbătâ, 6 di andreu. La startu ari 18 candidaț, ama un di elli trapsi mânâ, ași că armasirâ 17. La alidzerli locali dit cirișar 2024 avea intratâ tu astrițearea ti fotoliul di primar gheneral mași nauâ candidaţ, semnu că mirachea ti daua cama votata thesi dit statlu român criscu cabaia.
Sondajili scot tu padi unâ alumtâ anamisa di 3 bași 4 competitori. Trei yin dit partiili di prota thesi a arcului guvernamental. Elli sunt Daniel Băluţă, di la PSD, dimarhul di tora a sectorlui 4, liberallu Ciprian Ciucu, dimarhul ți easti tora pi thesi la sectorlu 6, şi deputatlu USR Cătălin Drulă, liderlu di ma ninti ali formaţiuni. Lâ si adâvgă giurnalista Anca Alexandrescu, independentâ pripusâ di Suțâllia electoralâ ”Andripatati ti Bucureşti”, andrupâtâ di AUR (opoziţia populistâ, ultranaţionalistâ, spusâ suveranistâ).
Candideadzâ nica George Burcea (Partia a Oamiñilor Tiniri, parlamentar, ți s-aspusi ișiș suveranistu), Ana Maria Ciceală (partia ali Sânâtati Educaţie Naturâ Sustenabilitati – SENS), Rareş Lazăr (Partia România tu Acţiune), Oana Creţu (Partia Suțial Dimocratâ Unitâ), Vlad Gheorghe (independentu). Ari nâdie ti dimarhia a Bucureştului şi ministrul di ma ninti suțial-dimucrat di finanţi, Eugen Orlando Teodorovici (independentu), Gheorghe Macovei (Partia România Mari), Gheorghe Neţoiu (independentu), Liviu Gheorghe Floarea (Partia Naţionalâ Huryeascâ Maniu Mihalache), Mihai Ioan Lasca (Partia a Patrioţlor a Popului Român), Angela Negrotă (independentâ), Dănuţ Angelo Trifu (independentu), Constantin-Titian Filip (independentu).
Unâ oarâ cu alidzerli di Bucureşti s-fac ș-alidzeri locali parţiali ş-tu alti ândauâ locuri. Di simasie easti consiliul giudeţean Buzău. Prit candidaţ easti și Marcel Ciolacu, liderlu di ma ninti a PSD şi premierlu ali Românie pânâ la alidzerli dit 2024, candidat fârâ tihi la prezidenţialili dit idyiul an, ți ș-ași furâ curmati.
Autor: Ștefan Stoica
Apriduțearea: Mirela Biolan
