1 di Andreu – Dzuua Naţionalâ ali Românie
Tu 1 di andreu 1918 cratlu românescu s-adră unâ. Transilvania, Banatlu, Crişana şi Maramureşlu s-ligarâ di Amirârilla ali Românie.
Tașcu Lala, 02.12.2025, 18:05
Aproapea 3.000 di aschirladz şi spețialişțâ dit Ministerlu ali Apârari Naţionalâ, Ministerlu di Emburlâchi di Nuntru, Servițiul Român di Informaţii, Servițiul di Telecomunicaţii Spețiali şi Administraţia Naţionalâ a Hâpsăñilor llo parti la parada militarâ andreaptâ, aseara, Bucureşti, cu furñia a Dzuuâllei Naţionali ali Românie.
Cama di 220 di cearei tehniți tricurâ pi sum Arcul di Triumf. La defilari luarâ parti şi 240 di aschirladz xeñi, dit arada a niscântor detaşamenti dit Galie, Machidunia dit Arațili, Ripublica Moldova, Polonia, Portugalia, Spania, SUA, cata cum şi aschirladz dit vâsiliili soați ți lucreadzâ la structurli NATO dit Românie, deadi tu șteari MApN.
România fu tu sârbâtoare: multi manifestări, țeremonii şi paradi militari furâ andreapti ti Dzuua Naţionalâ.
Ti prota oarâ, tu bitisita a defilarillei, tu ațea nae armasi dișcllisâ unâ expoziţie di tehni militarâ, iu laolu putu s-veadâ echipamentili și vehiculili filisiti di forțili di ascheri.
Tu câsâbălu ali Uniri, Alba Iulia, fu andreaptâ, tutnâoarâ, unâ paradâ ti ciudie cu cama di 1.000 di aschirladz, tehni di alumtâ ş-aeronavi.
Hlambura naţionalâ fu anâlțatâ aseara tu tuti instituţiili di ascheri dit vâsilie, iara la bordul a navilor maritimi şi fluviali fu anâlțat Marli Pavoaz.
Tutnâoarâ, aschirladzli ți suntu tu teatrili di operaţii ş-tu misiuñi di nafoarâ luarâ parti la țeremonii şi activităț spețifiți andreapti cu furñia a Dzuuâllei Naţionalâ.
1 di andreu 1918 easti dzuua cându s-adră unâ statlu naţional român. Tu bitisita a Protlui Polim Mondial, intrarâ tu Amirârillea ali Românie: Transilvania, Banatlu, Bucovina şi Basarabia, reghiuni iu bâna cama multu româñi, reghiuni ți eara pânâ atumțea sum cumândâsearea a amirâriilor austro-ungarâ şi ţaristâ.
Tu arada a paradâllei di ascheri dit 1 di Andreu s-bâgarâ niscânti ângârdiri di urdinari cu aftuchina tu partea di ncheari ali capitalâ.
Ministerlu di Emburlâchi di Nuntru lâ feați tâmbihi a oamiñilor s-nu analțâ droni tu chirolu di dzâli adyi ahârdzâti ti Dzuua Naționalâ. Lucurlu fârâ izini putea s-aducâ zñie a activitățlor di simasie dizvârtiti di autorităț ş-putea s-bagâ tu piricllu sigurlâchea a oamiñilor, dzâsi MAI.
Autor: Mariana Chiriță
Apriduțearea: Mirela Biolan
