Festivallu Național di Teatru
36-a ediție a Festivallui Național di Teatru di București ari 88 di reprezentații și unâ selecție ufițialâ di 36 di spectacoli dit stagiunea di tora.
Tașcu Lala, 31.10.2026, 22:16
Festivallu Național di Teatru (FNT) ți s-dizvârteaști București – proiectu cultural strateghic finanțat di Ministerlu a Culturil’ei – agiumsi, estan, la 36-a ediție. Evenimentul adrat di Uniunea Teatralâ dit Românie ahurhi tu 16 di sumedru și, chiro di dzați dzâli, pânâ tu 25 di sumedru, âl’i câlisi tu săli di spectacoli tuț ațel’i ți vor s-hârseacâ di ațeali 36 di spectacoli aleapti ufițial dit cama di 150 di producții ali stagiuni 2025–2026.
Perspectivi, formuli sțeniți și themi ahoryea… tuti s-feațirâ anvârliga di thema gheneralâ a edițil’ei – ʺ[…]perfectu umanʺ, ți pripuni unâ mutreari a perfecțiunil’ei ică a imperfecțiunil’ei, a vulnerabilitatil’ei și-a turliel’ei cum nâ aspunem adzâ, ligâturli cu alanțâ, cu suțietatea ș-cu tehnologhia. Alidzearea aților 36 di spectacoli easti, ama, mași nucleulu a programlui. Pi ninga aesti, Festivallu Național di Teatru aleapsi s-aspunâ și spectacoli și evenimenti ți s-aibâ direcții proprii. Acutotalui, 88 di reprezentații tu 24 săli di spectacoli dit Capitalâ.
Republica Moldova fu câlisitâ București cu dauâ producții di Chișinău: Richard III-lu, tu versiunea sțenicâ și regia al Petru Hadârcă, adrat di Teatrul Național „Mihai Eminescu” și Macbeth, tu regia al Slava Sambriș, adrat di Teatrul Republican „Luceafărul”. Dapoaia, modulul FNT Educațional, ți easti la 5-a ediție, pripuni andamusi cu teatrul ti elevi și hilandzrâ. Modulul ari, tutnâoarâ, conferinți, atelieri și andamusi ahârdzâti a ligâturil’ei anamisa di teatru și educație.
Tu programlu a Festivallui ari Dialog cu tuti artili, prit spectacoli di operâ și operetâ – easti zborlu di producții ali Operâ Naționalâ București („Carmen” di Georges Bizet, regia artisticâ și light design Ada Lupu Hausvater și „Lakmé” di Léo Delibes, regia Andrei Șerban), cata cum și un spectacol adrat di Teatrul Național di Operetâ și Musical „Ion Dacian” („Romeo și Julieta”, regia KERO și apânghisit di aestu: „Elixirlu a vrearil’ei”, regia Laura Maria Vlădoiu). Nu nai tu soni, Festivallu Național di Teatru intră ș-tu dialog Internațional, prit ʺMigration Diary. New York City Editionʺ, spectacol multimedia di Carmen Lidia Vidu, adrat di Teatrul Experimental La MaMa (New York) deadun cu Institutlu Cultural Român di New York, a curi lâ si adâvgarâ ș-alti evenimenti adrati cu Institutili Culturali di București.
Neisi, dialoglu ali ediție di estan a Festivallui Național di Teatru cu publiclu a lui va s-dzâcâ cama di 50 di alti evenimenti: spectacoli-lecturâ (adrati pi textili a unâl’ei astrițeari di dramaturghie românească și pi apriduțeri dit dramaturghia contemporanâ pripusi di instituti culturali), moabeț, conferinți, expoziții, scuteri di carțâ, instalații performativi, andamusi cu artișțâ, spectacoli di teatru radiofonic și spectacoli di teatru TV.
Autor: Roxana Vasile
Apriduțearea: Mirela Biolan
