Alâxerli a sţenâl’ei politică
După triţearea a euroscrutinlui, mutrit ca unâ repetiţie ghenearală nintea a prezidenţialilor dit toamnă, partidili politiţi româneşti, prota ş-prota aţeali parlamentari, minduescu ta şi-ndreagâ lucurlu di nâuntru icâ s-caftâ năi căl’iuri ti hâirlatica electoralâ. Nai cama cilâstisitor sâ spuni PNL (opoziţia di ţentru-dreapta), tru cazlu a curi scorlu di la alidzeri, 15%, sum ştacheta apufusită, li minti apili di nâuntru. Prezidentul a PNL, Crin Antonescu, trapsi mâna di la câpia a partiil’ei şi di la statutlu di prezidenţiabil veteran di u dişcl’isi calea a pâzârâpserlor tră unâ achicâseari cu PDL (tut opoziţia di ţentru-dreapta), tră cari spuni că poati s-acaţâ mastea a unâl’ei adunari stog.
Florentin Căpitănescu, 03.06.2014, 13:28
După triţearea a euroscrutinlui, mutrit ca unâ repetiţie ghenearală nintea a prezidenţialilor dit toamnă, partidili politiţi româneşti, prota ş-prota aţeali parlamentari, minduescu ta şi-ndreagâ lucurlu di nâuntru icâ s-caftâ năi căl’iuri ti hâirlatica electoralâ. Nai cama cilâstisitor sâ spuni PNL (opoziţia di ţentru-dreapta), tru cazlu a curi scorlu di la alidzeri, 15%, sum ştacheta apufusită, li minti apili di nâuntru. Prezidentul a PNL, Crin Antonescu, trapsi mâna di la câpia a partiil’ei şi di la statutlu di prezidenţiabil veteran di u dişcl’isi calea a pâzârâpserlor tră unâ achicâseari cu PDL (tut opoziţia di ţentru-dreapta), tră cari spuni că poati s-acaţâ mastea a unâl’ei adunari stog.
Ma s-hibâ di liderl’ii a aţilor dauâ mări partidi ali Opoziţiei va s-agiungâ pi achicâseari, lugursescu analiştil’i politiţ, multu zburâta unificari a dreptâl’ei — altâ turlie, adratâ sârmi-sârmi tru ma multi formaţiuni — ahurheasti s-acaţâ toarâ. Ca apandisi, vini aproapea unâ ş-unâ, suţata di stânga PSD-UNPR-PC (la co-guvernare), prota furteaţâ politică dit vâsilie, cari dimândă tamam prit premierlu social-democrat Victor Ponta, că va s-ahurheascâ lucurlu deadun, toradioară, maşi tru plan local, cu PP-DD (opoziţia populistă). Victor Ponta:
”Cata tru tuti giudeţili majoritatea va s-hibâ PNL-PDL şi, andicra di aestâ catastisi, cadealihea că va s-minduim, cât avem câbilea, nica ş-tru opoziţie, s-nu him singuri, şi putem, dealithea, sâ zburâm tru teritoriu cu aţel’i di la PP-DD, ti furn’ia că el’i nica suntu tru consiliile giudeţene. Şi, aestâ easti, va s-him tru opoziţie la nivel local”.
Colaborarea, minduescu observatorl’ii, easti spunearea a ni isihâsiil’ei ţi agiumsi tru sinlu a PSD di hâbarea ţi vini di câtâ dreapta, la cari s-adavgă şi rezultatlu di la alidzerli europarlamentari. Aţeali 37 di proţenti amintati di suţata PSD-UNPR-PC l’i-asiguripsirâ a aiştei victoria, cari, ama, nu fu unâ anvalitâ di giuneaţa, cari s-ngroapâ si ma ahânda nâdiili a dreptâl’ei, tru perspectiva a prezidenţialilor dit brumar. Di altă parti, minduescu idyil’i analişti, parteneriatlu cu PP-DD, formaţiune cari, dupâ boom-lu di la legislativili dit 2012, slâgheaşti, dimec easti spunearea că, tru România, iţi partid cu niheamâ furteaţă electorală easti ti acâţari tru isapi, cari ţi s-hibâ oamin’il’i ţi lu cumândusescu, icâ minduita a lui ideologica ica istoriclu a lui. Cu tuti minăli ţi li fac, tru aestu chiro, partidili polititi, easti multu zori s-duchim ţi va sâ s-facâ tru yinitorl’i meşi, până la prezidenţiale. Aestţ ti furn’ia că chirolu scoasi tru migdani că, tru România, achicâserli yin pisti noapti, suţatili nu au bană lungă, iara purdarea ica fâdzearea suntu unâ turlie di arada tra s-facâ politică.
Armanipsearea: Tascu Lala
