Cătă ună mari suţată PNL-PSD-UDMR ?

Leyla Cheamil, 09.11.2021, 19:13

București, s’contureadză tut ma multu un guvern PNL-PSD-UDMR, după ţi cabinetlu minoritar adratu ditu PNL — UDMR, cumăndusitu di lidirlu liberal Florin Cîţu, fu dimis pritu moțiune di cenzură tu ahurhita ameslui sumedru, iara preziditutulu Klaus Iohannis dimăndă, stămâna tricută, că va s’grească partidili la consultări maş tru oara and ava s’hibă nclligată ună majoritati parlamentară asumată.

Liberalii numata aprukeară să znuească alianța cu USR, ase că, tră PNL opțiunea amintătoari pari s’hibă, tora, PSD, diadunu cu cari avemu guvernată, tru perioada 2013 — 2014. Iara aţea nu fu prima alianţă guvernamentală Dreapta — Stânga. Tru 2008, Partidlu Dimocrat cumăndusitu di facto di preziditutulu Traian Băsescu feaţi guvernu cu social-dimocraţllii al Mircea Geoană. Dimi, cumăndusearea liberală apufusi, cu majoritate di voturi, că va s’ahurhească negocierli cu PSD tra s’adara guvernul.

Ditu aestă nauă majoritati va s’facă parti şi UDMR şi minorităţli naţionale. Condițiile pi cari li bagă liberalii nu sunt negociabile. Aeșţă voru ca niţi ună taxă s’nu hibă mărită, iara statlu s’hibă un partener tiñisitu a mediului di afaceri. Nu dip utu soni, elli vor formarea a unei majoritati anvărliga a PNL cu premier liberal. Tutunăoară, PNL ari tru videală duţearea ma largu a reformilor administrative, maxusu tru comate a tiñiiloru di cafi mesu şi a pensiilor, cum şi tiñisearea a parteneriatlui cu șeflu a statlui, Klaus Iohannis.

Tră mini sunt importanti reformili. Voi s’vedu cu cari putemu s’adramu reforme tru perioada yinitoari şi lipseaşti s’aflămu un partener tră atea că singur, PNL nu ari majoritatea tru Parlament. Mini amu sinferu s’nidzemu ma largu cu reformele ditu PNRR, reforma a pensiilor, reforma a tiñiiloru di cathi mesu, reforma administraţiei publiţi, s’nă asiguripsimu că va’lu ţănemu ma largu ritmolu di creaştiri a hărgiloru cu investiţiileˮ, spunea prezidentulu PNL, premierlu interimar Florin Cîțu.

Tu arada a llei, conducerea PSD, cari veadi tru liberali șansa ta s’intră la guvernare, votă, tru unanimitate, nkisearea a negocierilor cu acști. Consiliul Politic Naţional ş-deadi izinea, tră atea că himu dişclliişi s’negociem tră ndridzearea a problemelor a românilorˮ, spusi prim-vicepreşedentulu PSD, Sorin Grindeanu. Social-democraţlli apufusiră şi ună listă di meatri cari s’hibă loati tru perioada yinitoari. Easti zborlu, ntră altili, ti kivernisearea-a pandemiillei, criştearea alocaţiilor, indexarea pensiilor a tiniiloru di cathi mesu nai cama ñică.

Ditu yinitorlu guvern va s’facă parte și UDMR, cari apufusi ahurhearea a negocierilor tră formarea a unei mari coaliţii cu PNL şi PSD ndrupătă di minorităţli naţionale. Prezidentulu Kelemen Hunor spunea că aestă coaliţie ari noimă cara potu s’hibă adrati reformi tră revizuirea a Constituţiillei, introduţirea a ripublicălleii parlamentare hiinda un ahtari obiectivu importantu.

Autoru: Leyla Cheamil

Armânipsearea: Taşcu Lala