Călin Georgescu, bâgatu ahapsi ti șcurtu chiro pânâ la apofasea ditu soni a giudicâtorilor
Curtea di Apel București apufusi bâgarea tu ahapsi ti 30 di dzâli a candidatlui di ma ninti la președinție, Călin Georgescu
Tașcu Lala, 01.10.2026, 07:55
Candidatlu di ma ninti la preşedinţia ali Românie, Călin Georgescu, luyursit proarus, fu bâgatu ahapsi, marțâ, ti 30 di dzâli pânâ la apofasea ditu soni a giudicâtorilor, tu unu dosar di arâdeari/aplânisiri şi apartenenţâ la unâ parei infracţionalâ organizatâ. Idyea apofasi fu loatâ ş-ti omlu ți lu agiută, emburlu/pârmâteftul Ionel Rusen, misticat tu adunarea di fonduri ti campania al Georgescu la alidzerli prezidenţiali ditu 2024. Apofasea ali instanţâ easti ațea ditu soni, aestu hiindalui unlu ditu ațeali cama mutritili cazuri giudițiari di tora ditu vâsilie. Instanţa apruche contestaţia a procurorlor DIICOT (Parchetlu antimafia) contra a apofâsil’ei a Tribunalului Bucureşti pritu cari Călin Georgescu fu alâsat tu libirtati, sum mutritâ giudițiarâ. Aoa ș-unâ stâmânâ, el fu bâgatu ahapsi ti 24 di sâhăț, ti adrarea ali unâ parei infracţionalâ organizatâ şi arâdeari/aplânisiri ți poati s-aducâ zñii multu mări. Ancheta tu aestu caz ahurhi di la un embur/pârmâteftu di Buzău ți s-plâmsi că Georgescu l’iadră zñie di un milion di evradz. Procuroril’i bâgarâ sechestru (dânâseari di la cratu, cu ândreptu, a unlui adârâmintu – borgi ti pâradzl’i ți âl’i chiru) pi casa ațea marea alu Călin Georgescu di Mogoşoaia, ta sâ-și l’ia nâpoi pâradzlji cu cari fu arâsu/aplânisit.
Udisitu cu niscânti izvuri giudițiari, adusi aminti di mass-media, procuroril’i câftarâ ti aestu dosar informaţii ditu Letonia, Italia, Marea Britanie şi Elveţie. Zñia s-alinâ la 1,1 miliuni di evradz: unu milionu ta s-hibâ investiţ tu metali scumpi, iara 100.000 ti campania electoralâ. Cazlu dusi la multi moabeț apreasi tu media româneascâ, ama ș-la minduiti ți suntu dip ahorhea. Ma mulțâ oamiñi ți țânea cu elu s-adunarâ dinintea a instanțâl’ei ta sâ-și aspunâ andruparea, dzâcândalui că Georgescu ți candidă la alidzerli prezidențiali di ma ninti, easti nicâbâtli (nu ari canâ câbati). Pi di altâ parti, ari ș-boț cari scotu tu migdani ți multâ zñie aduc acuzațiili a procurorlor. El’i cundil’eadzâ că niți unu omu nu poati s-ascapâ di nomu și caftâ transparențâ di dipu ti izvurli di finanțari filisiti ma ninti di Georgescu.
Aduțemu aminti că alidzerli prezidențiali ditu Românie furâ curmati tu meslu andreu 2024 di itia a șubeilor di misticari ali Arusie ti andruparea alu Călin Georgescu, cari amintă proltu tur, ş-cari eara luyursitu unlu ți câtâyursea emu Ocțidentul, emu agiutorlu ti Ucraina. Moscova nu apruche acuzațiili, ama procuroril’i bâgarâ oarâ că s-feațirâ atacuri țibernetiți și campanii para mări di dezinformari/arâdeari. Alidzerli s-feațirâ diznău tu meslu mai 2025 ș-li amintă proevropeanlu Nicușor Dan. Câtu ti Călin Georgescu, a lui nu âl’i si deadi ândreptu s-candideadzâ. El easti giudicat tora tu nica dauâ dosari: unlu ti goada ți u adusi ali sigurlâchi naționalâ ș-altu ti scutearea tu migdani, paranomu, a liderilor fascișțâ ditu chirolu anamisa di dauli pulemati mondiali. Georgescu nu aproachi lucârli ti cari easti aflatu câbati.
Autor: Leyla Cheamil
Apriduțearea: Mirela Biolan
