Chivernisea Bolojan, datâ mpadi prit moţiuni di țenzurâ
Chivernisea di Bucureşti cumândâsitâ di liberallu Ilie Bolojan fu datâ mpadi, marțâ, prin moţiuni di țenzurâ, cu unâ vârtoasâ andrupari parlamentarâ.
Tașcu Lala, 30.05.2026, 13:45
Chivernisea di Bucureşti cumândâsitâ di liberallu Ilie Bolojan fu datâ mpadi, marţâ, dupâ apruchearea ali moţiuni di țenzurâ anchisitâ di PSD, AUR şi IRINI – Prota România. 281 di voturi/psifuri furâ “ti”, 4 “contra”, iara 3 voturi/psifuri nu furâ aprucheati, tu catastisea tu cari PNL şi USR avea dzâsâ că nu va s-llia parti la vot/psif. Eara ananghi di 233 di psifuri ta s-poatâ s-da mpadi chivernisea. Executivlu chiru, ași, andruparea a parlamentului ş-agiumsi interimar ti un chiro di nai multu 45 di dzâli, cu atribuţii mârdziniti.
Moabețli dit plenlu a leghislativlui furâ apreasi. Ațelli ți anchisirâ moţiunea câtâyursirâ misurli luati di chivernisi, ti cari dzâsirâ că dusirâ la recesiuni economicâ şi urfâneațâ, acuzaţii niaprucheati di Ilie Bolojan. El dzâsi că partenerilli suțial-dimucraţ ali suțâlle di ma ninti suntu făț-făț, di cara loarâ parti la misurli di scâdeari a hărgilor a cratului.
Dupâ psiflu ali moțiuni și darea mpadi ali chivernisi, Partidul Național Liberal apufisi, tu ședințâ, s-treacâ tu opoziție, “avândalui un rol activ, responsabil şi constructiv ti sinferlu a țetăţeañilor ş-a stabilitatillei icunomicâ”, dupâ cum dzâsirâ reprezentanțâlli ali formațiuni. Ilie Bolojan dzâsi că PNL easti unâ partie cu nâmuzi, ți va s-adarâ un pol di modernizari, unâ Românie modernâ, un crat cari s-lâ aducâ prucuchie a țetățeañilor.
Niți USR nu mata va s-hibâ arada di PSD la chivernisi şi, dupâ unâ şedinţâ di urghenţâ, pripusi un lucru deadun cama stres cu liberalilli ș-unâ coordonari anamisa di dauli partii ti moabețli cu prezidentul. Liderlu Dominic Fritz deadi asiguripseri că formaţiunea va s-ducâ ma largu direcţia di alâxeari şi va lâ pripunâ a liberalilor unâ achicâseari politicâ ti un lucru chino tu chirolu ți yini.
Pi di altâ parti, liderlu PSD, Sorin Grindeanu, dzâsi că psiflu para mari di la moţiuni aspuni unâ adrupari ma mari di cum s-aștipta tuț şi luyurseaști că partiili lipseaști s-aflâ cușia unâ cearei ti lucru deadun.
Iara prezidentul AUR, George Simion, dzâsi că formațiunea a lui, naţionalistâ, ți easti tora tu opoziţie, easti etimâ sâ-și llia borgea ti unâ chivernisi ți va s-facâ tu yinitor.
Unlu dit liderilli UDMR, Tánczos Barna, mindueaști că va s-hibâ ananghi di stâmâñi i vahi meși pânâ va s-adunâ unâ majoritati parlamentarâ.
Dupâ darea mpadi a executivlui di Bucureşti, prezidentul Nicuşor Dan, ți avu un rol clleai tu adrarea a chivernisillei di ma ninti ali suțâlle, dzâsi, tu unâ declaraţie di presâ, că ahurhi moabețli ti un nău executiv. Şeflu a statlui deadi asiguripseri că România va s-aibâ unâ nauâ chivernisi pro-ocțidentalâ tu unâ iami chiro cu dichi şi dzâsi că nu va s-facâ alidzeri antițipati/ninti di vadé. “România easti un crat stabil, instituţiili a statlui lucreadzâ ghini şi România ari unâ direcţie ți ș-u țâni.” – adâvgă Nicuşor Dan.
Autor: Daniela Budu
Apriduțearea: Mirela Biolan
