Comisia Ivropeanâ – apofasea mutrindalui TikTok
Comisia Ivropeanâ şi-adră ma vârtoasâ mutrearea cu mengâ ali platformâ TikTok tu contextul a alidzeriloru ditu Românie.
Tașcu Lala, 09.12.2024, 12:14
Esti unlu ditu subiectili cama zburâtili, tora, la livel ivropeanu, di la instituţii şi autorităț pânâ di presâ: unâ campanie ghini andreaptâ pi platforma TikTok, di miliuni di dolari, lu andrupâ, taha, pi candidatlu independentu la prezidenția ali Românie, Călin Georgescu, tu protlu turu di scrutinu ditu 24 di brumaru, a că elu dzâți că nu hârgiui niți unu pâră.
Ânchisindalui di la aestâ mindueari, Comisia Ivropeanâ deadi tu șteari, gioi, că ș-adră ma vârtoasâ mutrearea cu angâtanu a platformâllei TikTok uidisitu cu nomlu ivropeanu mutrindalui servițiili dighitali. Comisia dzâsi că misura easti ligatâ di bâgarea tu practico a competenţiloru ți âlli si cadu a Executivlui ali Uniuni Ivropeanâ uidisitu cu nomlu adusu aminti ma ndzeanâ ş-nu s-minteaști tu proțeslu electoralu ditu Românie, cari easti unu lucru ți țâni di autoritățli româneșțâ şi, pânâ tu soni, di popolu românescu.
Comisia âlli deadi cumandu alu TikTok s-țânâ nialâxiti tuti informaţiili di pi platformâ şi ditu sistemu tu ligâturâ cu tuti alidzerli ditu Uniunea Ivropeanâ anamisa di 24 di brumaru 2024 și 31 di marțu 2025. Aesta, maca va s-facă unâ investigaţie suplimentarâ ali Comisie ti tiñisearea a borgiloru ți lipseaști s-li aibâ TikTok. Executivlu comunitaru, ți dzâsi că, tu aestu stadiu, nu ari nici unâ poziţie mutrindalui posibilitatea că platforma și-călcă borgili legali și adră, tutnâoarâ, unâ andamusi cu tuti statili membri la livel di autorităț ți mutrescu bâgarea tu practico ali legislaţie mutrindalui servicțiili dighitali, cata cumu și unâ andamusi pi problemi di securitati țiberneticâ.
Audiaț ma ninti tu Parlamentul Ivropean, reprezentanţâlli TikTok dzâsirâ că, tu aesșțâ trei meși ditu soni, furâ scoasi di pi platformâ 66.000 di conturi falsi, 10 milioani di oamiñi falşi ți mutrescu, cata cumu şi 1.000 di conturi ți dzâțea că, taha, suntu a niscântoru candidaţ tu alidzerli ditu Românie. Tutnâoarâ, directorlu ti politiț publiți şi ligâturi guvernamentali ditu TikTok, Caroline Greer, feați tâmbihi că, ti alidzerli prezidenţiali ditu Românie, platforma nu u ari borgea maca niscânti informaţii nu furâ dati tu padi di electoralu.
Dupâ spusa a corespondentului Radio România di Bruxelles, maca dupâ mutrerli cu angâtanu fapti di Comisie va s-iasâ tu padi că TikTok nu tiñisi leghislaţia ivropeanâ mutrindalui servițiili dighitali, pot sâ-lli si da sancţiuni ți pot s-agiungâ la 6 proțenti ditu țifra di emburlâchi globalâ pi anu, iara ti niscânti câlcări a nomlui fapti di ma multi ori, poati s-hibâ dânâsitâ ti unu chiro platforma tu spaţiul ivropeanu, pânâ cându problemili suntu ândreapti. Tu Românie, maș autoritățli naționali suntu ațeali ți va s-poatâ s-llia apofasea – di la ancheti pânâ di niscânti sancţiuni ti oamiñi i tâbâbii di oamiñi.
Autor: Roxana Vasile
Apriduțeara: Mirela Biolan
