Deputaţl’i l’ia apofasi contra a traficlui di droguri

Camera Deputaţlor di București apufusi tru unanimitati năili misuri europeani tră combaterea traficlui di droguri.

Tașcu Lala, 11.09.2026, 16:19

Bearea-a drogurloru tru Românie criscu, tru an’il’i ditu soni, la aproapea tuti categoriili di substanți, cu ună lăhtăroasă tindeari maxusu tru arada a tinirloru și a cilimean’iloru, ama și a mul’erloru tiniri.

Autoritățli naționali l’ia misuri di prevenție și yitripseari pritu instituții speţializati tră combaterea consumlui paranomu di droguri. A deapoa, Parlamentul faţi isapi niacumtinatu ti năi pripuniri leghislativi tră agiutarea a victimilor aliştei adicții.

Specialiști tru dumeni facu timbihi, ama că pi ningă gaereţli fapti ti n’icurarea a riscurloru, prevenirea supradoziloru ică campaniili educativi tru sculii, easti ananghi, nai cama multu, di nomuri fapti contra a traficlui di substanți interdzăsi.

Cumu aestea suntu ună turlie mari di criminalitati organizată nu maş națională, ama şi transnațională, instituțiili a statlui colaboreadză pi nivel european tra s-curmă infracționalitatea di aestă turlie. Baş n’iercuri, Camera Deputaţlor di București adoptă tru unanimitati năili misuri europeani tră combaterea traficlui di droguri.

Un planu di acţiuni ali Uniuni tră yinitorl’i 5 an’i mutreaşti prevenţia timpurie şi anvărtuşearea controlui tru sinurli externi, pritu ufilisirea tehnologhiilor di scanari a bărnului ditu soni. Planlu european pruveadi, tutunăoară, reguli serti mutrinda monitorizarea tru timpu realu a precursorloru chimiţ tra s-dănăsească fabricarea drogurloru sintetiţi şi misuri serti contra a recrutaril’ei a minorloru pritu şingirili suţiali.

Naua strateghie andrupaşti și ună abordari mutrinda ţi cali acaţă păradzl’i, di combateri ti aruşfetea asociată cu traficlu di droguri şi di integrare a cooperaril’ei cu yimbruchea, poliţia şi judiciarlu tru un cadru unitaru. Andrupati, isa-isa, anvărtuşearea cooperaril’ei cu stati terţi aflati pi rutili di traficu, maxusu ditu America Latină, Africa di Ascăpitată, Balcañil’i ditu Ascăpitată şi reghiunea Orientului di Mesi şi ali Africă di Nordu.

București, reprezentanţăl’i a tutuloru grupurloru parlamentari spusiră că easti ananghi făţearea ma cu hăiri politiţli şi acţiun’ili di combateri a traficlui şi bearea di droguri. Tu amprotusa easti combaterea şingiriloru di contrabandă ditu Portul Constanţa la Amarea Lae şi di la sinurli terestri.

Deputata AUR Cristina Dascălu: ʺS-li curmămu şingirili criminali, s-lă lomu amintatiţli, s-vigl’emu cama cu hăiri sinurli şi porturli şi s-anvărtuşimu cooperarea anamisa di poliţie, justiţie, agenţăl’i european’i.ʺ

Iarapoi deputatlu USR Stelian Ion zbură ti misuri concreti: ʺPritu PNRR, România ari accesată aproapea 34 di miliun’i di euro tra s’ancupără 26 di scanere di mare capaţitati. Născănti di eali suntu băgati tru Portul Custanţa şi am nădie că va s’agiută ti combaterea aliştei lăngoari.ʺ

Cu un zboru, pritu adoptarea strateghiil’ei europeani tră combaterea traficlui di droguri, structurli di speţialitati ditu România şi aţeali europeani va s-da silă ti cooperarea unu-alantu cu scupolu tra s’ndreagă ună problemă di mari simasie ti suţiitati.

Autor: Roxana Vasile
Armânipsearea: Taşcu Lala