Disfăţearea-a secțiillei speţială ti magistraț, tru muabeti
Subiectul ti disfăţearea-a Secţiillei tră Investigarea-a Infracţiunilor ditu Justiţie (SIIJ) năpoi yini tu prota thesi tru România unăoară cu avizlu ţi ălu deadi tu aestă noimă Comisia di Veneția. Aesta pitricu hăbari a Bucureștiului că demersul easti ghini vinitu, năpoi spunănda că superimunităţli ţi eara dati a magistraţlor lipseaşti s’hibă eliminati — Consiliul Superior ali Magistratură nu lipseaşti s’agiungă ună sită tra s’da giueapi penalu procurorllli ică giudictorllli.
Corina Cristea, 06.07.2021, 14:07
Subiectul ti disfăţearea-a Secţiillei tră Investigarea-a Infracţiunilor ditu Justiţie (SIIJ) năpoi yini tu prota thesi tru România unăoară cu avizlu ţi ălu deadi tu aestă noimă Comisia di Veneția. Aesta pitricu hăbari a Bucureștiului că demersul easti ghini vinitu, năpoi spunănda că superimunităţli ţi eara dati a magistraţlor lipseaşti s’hibă eliminati — Consiliul Superior ali Magistratură nu lipseaşti s’agiungă ună sită tra s’da giueapi penalu procurorllli ică giudictorllli.
Ministurlu a Justiţiillei, Stelian Ion, argumentă minduita a Comisiillei di Veneţia – aşi-dzăsili garanţii tră magistraţ reprezintă tru realitati “niscănti imunităţ”, cari nu va s’facă altuţiva că maş “s’arucă ună aumbră că easti pi dauă tu ligătură cu actulu di justiţie”. Tru minduita a ministurlui, nu mata suntu argumenti tră s’nu disfacă Secţia tră investigarea-a infracţiunilor ditu justiţie, iara apofasea poati s’hibă loată stămâna ţi yini, tru Senat. Ma ninti, Camera a Deputațlor deadi aviz tru favoarea a CSM la pitriţearea tu giudico a procurorlor ică a giudicătorloru tră iţi fapti penali, nica şi ateali di aruşfeti.
Stelian Ion: “Avânda tu videală aestă confirmari ditu partea-a unlui organ independentu a Consiliului ali Europă, adratu prota ş’prota ditu specialişti tru dreptu constituţional, dimi, ia, nafoara a aluştuiu halatu internu, aistoru dezbateri şi ankidicări pi mardzina aliştei temă, avânda tu videală aestu andrupimintu – şi voi s’haristusescu a membrilor ditu Comisia di Veneţia şi a raportorloru, maxusu că deadiră cali cu celeritati la căftarea a noastră – dimecu, avânda tru videală aesti lucri, nu vedu alti keadiţi.”
“Apandisea a Comisiillei di Veneţia aproakei atea că demersul a meu ca prezidentu ali Comisie Juridică şi a soţloru a mei senatori PNL mutrinda eliminarea superimunităţlor tră magistraţ fu unu corectu, declară liberala Iulia Scântei. Uidisitu cu năsa, pritu disfăţearea a SIIJ va s’ncllidă un capitolu arşinosu a aluştoru ditu soni añi, cându independenţa a magistraţlor fu loată cu asaltu. USR PLUS, co-parteneru la guvernari a PNL, lugurseaşti că avizlu a Comisiillei di Veneţia nu easti ti ciudie, di itia că dişcllidearea-a secţiei tră investigarea infracţiunilor ditu justiţie fu criticată ditu ahurhită di tuti instituţiili europeani. Axizerli di aruşfeti lipseaşti s’toarnă la DNA, iara amendamentili la nomu lipseaşti s’hibă scoasi – spuni USR PLUS.
Ditu opoziție, ama, ma marea partie, PSD, ş-u ţăni ma largu minduita ta s’ncuntreadză la iţi alăxeari a nomurloru ali justiţie, ma s’nu aibă unu largu consensu anamisa di magistraţ tu ligătură cu protecţia a giudicătorloru andicra di presia şi abuzurli di iţi turlie. Ma multi suţati a magistraţloru ditu România lugursescu că prezidentulu a CSM lipseaşti ta ş’da demisia, dupu punctulu di videală comunicatu di Comisia di Veneţia. Condiţionarea ti pitriţearea tru giudico a magistraţlor suspectaţ di corupţie di ancuviinţarea a secţiilor CSM easti ună sită niconstituţională şi scadi pistipsearea publică tru actul di justiţie, spunu suţatili ditu dumeni.
Autoru: Corina Cristea
Armânipsearea: Taşcu Lala
