Fudzearea ditu Afganistanu
Haua lu-acăţă Afganistanlu după ritrădzearea-a askeriloru americani. Comunitatea internaţională canda fu loată pri napandica şi easti tu ananghi tora ta s’llia meatri di ananghi. Talibañilli anăchisiră maş ti ndauă dzăli mărlli căsăbadz a văsiliillei și arăsturnară guvernul di Kabul. Elli dimăndă că polimlu s’bitisi și caftă a comunitatillei internațională s’nu hibă izolaț. Tru aestu kiro, cama di 60 di stati caftă a talibañilor ca a tutăloru cetățeañilor cari voru s’fugă ditu văsilie s’lă da izini s’fugă.
Daniela Budu, 17.08.2021, 13:51
Haua lu-acăţă Afganistanlu după ritrădzearea-a askeriloru americani. Comunitatea internaţională canda fu loată pri napandica şi easti tu ananghi tora ta s’llia meatri di ananghi. Talibañilli anăchisiră maş ti ndauă dzăli mărlli căsăbadz a văsiliillei și arăsturnară guvernul di Kabul. Elli dimăndă că polimlu s’bitisi și caftă a comunitatillei internațională s’nu hibă izolaț. Tru aestu kiro, cama di 60 di stati caftă a talibañilor ca a tutăloru cetățeañilor cari voru s’fugă ditu văsilie s’lă da izini s’fugă.
Tru chirolu anda catandisea easti cabaia greauă tru Afganistan, Ministerlu Afacerloru Externi di București dimăndă că Celula di criză interinstituţională convocată ditu dispoziţia a șeflui a diplomațiillei, Bogdan Aurescu, cilăstăseasti ta s’agiută şi s’da asistenţă ti cetăţeañilli români ţi suntu tu locurli afgani, cu scupolu ti puratarea a aluştoru tru condiţii di sigurlăki. Tutunăoară, Celula monitorizeadză evoluţiile şi easti tu ligătură cu partenerllii internaţionali ali Românie.
Tru unu comunicat, MAE năpoi aduţi aminti că lucărlu a Ambasadăllei ali Românie tu Kabul fu curmatu tru anlu 2019, dupu unu atentatu cari asparsi multu greu casa a misiunillei. Avânda tu videală ixikea a unăllei misiuni operațională tu Kabul nica și atea că Ambasada ali Românie di Islamabadu prilo reprezentarea a văsiliillei tru ligătura cu Afganistanlu, axia ti intervenție a aliştei misiuni tru Afganistanu easti ñicurată, maxusu tru aestu kiro anda catastisea di securitati ditu aestă văsilie easti multu greauă-nica cundilleadză comunicatlu MAE.
Ministerlu feaţi urminie susto, nică di viniri, cându fu alinatu nivelu di alertă ti Afganistan la aţelu maximu, ti cetățeañilli români cari s’ducu tru Afganistan i cari suntu tru aestu kiro pi teritoriul aluştui cratu s’caftă Ambasada ali României tu Islamabad şi să-şi dimăndă prezenţa tru reghiuni, cu spunearea a coordonatiloru a loru işiş tra s’poată s’hibă căftaţ tru catandisi di ananghi. Nica şi premierlu Florin Cîțu lă căftă a tutăloru cetăţeañilor români cari suntu tru Afganistan s’fugă ditu aestă văsilie.
Florin Cîțu: “Voi s’dimăndu a româñiloru cari nica suntu aclo şi nu feaţiră ligătura cu misiunea a noastră diplomatică ditu Pakistan s-u facă câtu cama ntrăoară. Tru aestă oară, vă spuşu, nivelu di alertă easti maxim. Fudziţ ună ş-ună ditu Afganistanu!”
Participarea ali Românie la misiuñili ditu Afganistan u nsimnă istoria a aluştoru ditu soni 19 di añi și a avu un rol di mari simasie ti anvărtuşearea a flancului ditu apirită — spun analiștii di politică externă. Uidisitu cu spusa a loru, pritu participarea tru Afganistan, România ș-anvărtuşi ligătura cu SUA ama și cu statili europene, cu aţelli cari vrea s’agiungă deapoa aliaț tru Organizația a Tratatlui Nordu Atlanticu și tru Uniunea Europeană. Ditu 2002 și până tora, cama di 32.000 di militari români loară parti tru teaturlu di operațiuni ditu Afganistan. 27 di askirladz români muriră și cama di 200 fură pliguiţ tru ateali aproapea dauă dechenii di prezenţă a askerilei română tru aestă văsilie. Prezența a Armatăllei Română tru Afganistan u custusi România aproapea 3 miliardi di lei.
Autoru: Daniela Budu
Armânipsearea: Taşcu Lala
