Industria română ș’alâxi comata di lucru
Daniela Budu, 09.04.2020, 00:33
Companii privati și di stat dit România s’adunâ stogu tra s’combatâ unâ di nai cama grealili lângori/ pandemia cu cari s’ampulisi vâroarâ duñeaua, ta s’adarâ hâlăț sanitari di protâ ananghi. Ministurlu a Economiillei, Virgil Popescu, dimândă câ tu aestu kiro ma multi companii ndregu maxus linii spețiali di producţie ti ahtări hâlăț, a deapoa ahurhinda di stâmâna ți yini, unâ miliuni di măşti chirurghicali va s’hibâ adrati cathi dzuuâ tru România. Tutunâoarâ, un scanner termic, concepţia 100% românească fu dizvoltatu şi adratu di industria naţională di apărari.
Uidisitu cu spusa a Ministerlui a Economiillei, produslu ți ari numa “CONDOR”, poati s’hibâ ufilisitu ti viglleari/ controlu iu ari multâ urdinari di oamiñi, trâ ñicurari kirolu di evaluari a heavrâllei tru locuri cata cum aeroporturi, metrou, sinuru, spitali ili instituţii publiți. Aduțem aminti câ industria naţională di apărari ari ahurhitâ huzmetea ta s’adarâ izoleti, ufilisiti ti purtarea cu sigurlâki a oaminiloru contaminaț. Virgil Popescu nica spusi că Ministerlu ali Apârari ari ndreaptâ unâ metodologhii hâirlâticâ di vuluseari-aprukeari/ certificarea tră firmili ți cilâstâsescu s’adarâ năi aparati di ventilari mecanică, anânghisiti ti yitripseari pacienţâlli greu lândzidzâț di COVID-19.
Tora ma ninti, la un postu di televiziuni, Virgil Popescu fâțea timbihi câ, em România, em Europa tutâ, suntu dependenti di importurli ditu China şi cundillea că, dupâ ți va treacâ aestâ criză sanitarâ, iecunumia românească nâpoi va ș’ahurheascâ lucârlu nica şi ațea câ, lipseaști acutotalui, s’hibâ minduitâ diznău ta s’hibâ adrati pi planu internu pârmâtii di mari ananghi/ esenţiali tu ahtări catandisi. Tru aestu contextu, ministurlu adusi aminti un program di micro-industrializari, cari fu alâxitu şi u’nkisi calea ti producţia di pârmâtii sanitari. El dimândă granturi tru valoarea di 65 miliuñi di lei (vârâ 13,5 miliuñi di evradz) ti 325 di companii ți vor ș’alâxeascâ comata di lucru a emburlâkillei cu producția di hâlăt sanitari.
Tu unâ andamasi cu reprezentanţâlli a producătorlor şi distribuitorloru ditu industria farmakeutică, nica și premierlu Ludovic Orban nâpoi adusi aminti câ un di scupadzlli a executivlui tu aestu kiro easti ta s’ndrupascâ producţia internâ di yitrii, biocidi şi hâlăț medicali, ș’aestâ turlie s’hibâ ñicuratu piriclliul ti niscânti dânâseri pi napandica/ sincopili ti aprovizionari tu catastisi di criză. Moeabețli avurâ tu amprotusa meatri ti asiguripseari stocurli şi aprovizionarea niacumtinatâ cu yitrii em ti pacienţâlli infectaţ cu năulu coronavirus, em ti pacienţâlli croniț, ama şi ațeali ți suntu ananghi ti pârmâtii și hâlăț sanitari cu vigllearea și afirearea-a personalui medical. Primlu-ministru hiritisi hâbarea a companiillei di stat Antibiotiți Iaşi cari va ș’ahurheascâ diznău producţia cu dauâ yitrii câftati n’pâzari-dimi paracetamolu şi novocalminlu. Ludovic Orban haristusi a companiilor farmakeutiți ti donaţiili şi agiutorlu ți lu’deadirâ tu aestu kiro ş’deadi asiguripseri că s’lucreadzâ ti “simplificarea şi flexibilitatea” a leghislaţiillei.
Ngrâpsearea: Daniela Budu
Armânipsearea: Tașcu Lala
