Moeabeţ tru Parlament mutrinda PNRR
Leyla Cheamil, 28.05.2021, 10:15
Reformi, investiţii şi ună ma bună chiverniseari a părălui public suntu scupadzlli a guvernului di București, cari va s’bagă tru practico Planlu Naţional di Redresari şi Rezilienţă părăstisitu tu Parlamentu di premierlu Florin Cîţu. Aţeali aproapea 30 di miliardi di euro ahărdziti di Comisia Europeană va s’agiungă tru tuti locărli ditu România, tra s’anvălească kirolu ţi s’kiru tru aeştă ditu soni 30 di ani, tăxi caplu a Executivului. Premierlu cundille că România va s-amintă, pi thimellilu a Planlui Naţionalu di Redresari şi Rezilienţă, păradz tră investiţii, maxus tru transporturi, educaţie şi sănătati, ama tră cari lipseaşti s-hibă asiguripsiti şi reformi ma multi.
El cundille că easti ananghi ti ună asiguripseari că va s-armănă tu idyea scară, tu kirolu ţi yini, ună strateghie ta s-nu s’hărgiuească părălu public tanalliurea: Aestu plan ică reformă nu nsimneadză ñicurarea a amintatiţloru, nu nsimneadză ñicurarea a pensiilor, nu nsimneadză alte sţenarii apocaliptiţi. Nsimneadză ună turlie di kiverniseari hăirlătică; s’păltimu şi pensii şi tiñii di cathi mesu ma mări până tru 2030, ama s’nu aspărdzemu ziya a catastisillei financiară ali Românie.ˮ
Planlu Naţional di Redresari şi Rezilienţă, easti un programu ţi fu minduitu altă turlie andicra di alanti proiecti dizvărtiti pănă tora pi fonduri europeani, spusi premierlu Florin Cîţu. Prim-ministurlu cundile că planlu alănci ca ună apandisi la criza ţi u adusi pandemia di COVID-19 şi ari ca protu scupo investiţiili şi reformili. El nica spusi că investiţiile loati ca borgi va s-hibă băgati tu practico cu investitori maxusu ditu România și feaţi timbihi, tru idyiulu kiro, că tuti investiţiile lipseaşti s’hibă bitisiti până tru 2026, altă turlie păradzlli evropeañi va s’hibă kiruţ.
Comisia Europeană easti sinfirisită s’aibă ună sustenabilitati a tiñiiloru di cathi mesu publitsi şi a pensiiloru, cundille, tu arada-a lui, liderlu PNL, Ludovic Orban, kiro tu cari coprezidentulu URS PLUS, Dan Barna, să spusi mplinu di nădii tu ţi mutreaşti ndruparea şi tiñisearea-a borgiloru tru planu politic şi a reformiloru pripusi di guvern.
Planlu adusi niifharistuseri tru arada ali opoziție, cari cutugursi elaborarea-a documentului și ălu stipseaşti Guvernul că ari naeti maş ti apofasi di sirţălle. Ti aţea, protlu partidu di opoziție, PSD, dimăndă că va s-dipună ună moţiuni di cenzură. Liderlu social-democrat, Marcel Ciolacu: Tut ţi pripusitu fu nglliţarea a amintatiţloru, criştearea a ilikiillei di pensionari şi criştearea-a taxiloru tră firmi şi populaţie. Vă ariseaşti s-minduiţ că hiţ apostallii a transparenţăllei, ama, pănu tu soni, hits maş trumpetili a sirţăiillei.ˮ
Coprezidentul AUR, ultranaţionalistu, George Simion, spusi, tu arada-a lui, că parlamentarllii a partidlui va s’ndrupască iţi moţiuni contra-a cabinetlui cumăndusitu di Florin Cîţu. Tu 31 di mai, România va s-dipună planlu tru sistemlu informatic ali Uniuni Europeană, a deapoa tu 2 di cirişaru va s’hibă publicat integral. Bucureștiul eastu băgatu tu planu ta s’aproaki 29,2 miliardi di euro, ditu aeşţă 14,2 miliardi sumu turlie di granturi şi 15 miliardi sumu turlie di împărmuturi.
Autor: Leyla Cheamil
Apriduţearea: Taşcu Lala
