Năi acţiun’i contra aruşfetâl’ei
Distribuţia di anami, dit cari şi nauâ minişţrâ di ma ninti şi emburi, alâxirâ ghinicânâscutlu dosar Microsoft vahi, tu nai ma avdzâtlu caz dit isturia giudiţiarâ ali Românii post-comunistâ.
Florentin Căpitănescu, 28.10.2014, 12:20
Distribuţia di anami, dit cari şi nauâ minişţrâ di ma ninti şi emburi, alâxirâ ghinicânâscutlu dosar Microsoft vahi, tu nai ma avdzâtlu caz dit isturia giudiţiarâ ali Românii post-comunistâ.
Unâ pisti alantâ, procurorl’ii caftâ s-aflâ detaliili ascumti mutrinda contractili prit cari, tu ma multi guvernări şi catandisi ayoriea, sistemlu di anviţari s-hârsi di licenţi IT, ama ca numir, cu multu pisti câti îi lipseau, şi, ca pâhă, dinclo di rezonabillu finanţiar.
Ti contractili dedicati — pi di altâ parti, un lucru ţi nu easti ici di aradâ tu politica di ancupârari a instituţiilor publiţi româneşţâ — decidenţâl’ii au luatâ comisioani cari, tu minduita a procurorilor, s-anvârtirâ iuva anamisa di milioani di euro.
Aşi s-adarâ că tutâ afacerea trapsi dzâţ di milioani di euro dit bugetlu ali vâsâlii, tu sinfuniili tu cari sistemlu di anviţari s-alumtâ cu sumfinanţarea di turlii cronicâ. Aţei dit soni oamin’i acâţaţ tu dosarlu Microsoft, suntu aţel di ma ninti ministru di la Comunicaţii, Gabriel Sandu, primarlu a câsâbălui Piatra-Neamţ, Gheorghi Ştefan, şi emburl’ii Nicolae Dumitru şi Dorin Cocoş. Dit aestu grup, ti Dorin Cocoş, chiola easti ştiut ca un embur di sucţes ţi totna câftă s-hibâ unâ prezenţâ discretâ, s-aspuni că easti nai ma marli pescu.
Hiindalui vidzut, an’i di dzâli, ca un apruchiat a caplui ali vâsâlii, Traian Băsescu, Dorin Cocoş, idyea cu mulţâ aşi-dzâşi emburi băştinaşi, nu şidzu alargu di contractili cu pâradz publiţi, ti cari, tu chiro, presa anyrâpsi că furâ timel’iu a imperiului finanţiar pi cari amintă s-lu adarâ.
Tu idyul dosar Microsoft, tu ahurhita a meslui, prezidentul Traian Băsescu apruchie anchisirea – tu ţi mutreaşti câftărli penali – ti ţinţi minişţrâ – Adriana Ţicău, Gabriel Sandu, Alexandru Athanasiu, Mihai Tănăsescu şi Daniel Funeriu. Ti alţâ trei, tora parlamentari – Ecaterina Andronescu, Şerban Mihăilescu şi Valerian Vremi – DNA aşteaptâ apruchiarea a Legislativlui ti ahurhearea a câftărilor di turlii penalâ. Tu catandisea al Dan Nica, eurodeputat tu mandat, Direcţia câftă avizlu a Parlamentului European.
Ti observatori, dosarlu Microsoft easti ca unâ cârunâ ti activitatea al DNA dit aeşţâ dit soni doi, trei an’i, dupu ţi, un lungu chiro, instituţia – chiola avea unâ cronicâ bunâ tu rapoartili pi giustiţii ali Comisii Europeanâ – alâsă impresia că nu s-vatâmâ tu alumta cu marea aruşfeti, vidzutâ ca hiindaei cancerlu dit administraţia româneascâ tu aţei dit soni 25 di an’i.
