Năi restricţii dimăndati tru România
“Statlu eșuă tru misiunea ta ş’veaglle cetățeañilli” – declara, tora ma ninti, prezidentulu ali Românie, Klaus Iohannis, cari, deapoa, pricunuscu că pregătirea tră dalga patru a pandemiillei fu deficitară, ama campania di vaccinare anti-Covid-19 s-mină multu cu preayalea.
Roxana Vasile, 21.10.2021, 20:26
“Statlu eșuă tru misiunea ta ş’veaglle cetățeañilli” – declara, tora ma ninti, prezidentulu ali Românie, Klaus Iohannis, cari, deapoa, pricunuscu că pregătirea tră dalga patru a pandemiillei fu deficitară, ama campania di vaccinare anti-Covid-19 s-mină multu cu preayalea.
Klaus Iohannis: “Easti ună perioadă a trăñipsearillei, ună dramă naţională di proporţii ti nipistipseari. Nu avem, am, altă opţiuni dicât să u năstriţemu. Prioritatea dzero easti, tru aestă oară, ascăparea a aţiloru di ningă noi, viglleari sănătatillei a ţiloru vulnearabili şi a aţiloru lăndzidz, pi cari asistenţa medicală poati s’lli-agiută s’năstreacă ti bunu ti aestă lăngoari.”
Niercuri, Klaus Iohannis gri ti ună andamusi cu tuţ responsabilii guvernamentali, tră băgarea tru lucru a niscăntoru misuri restrictivi cu titlu di prevenție, ama și di coerciție. Vaccinarea easti goala cearei tră dănăsearea a pandemiillei – spusi, după andamusi, prezidentulu, cari zbură ti ună catastrofă sanitară. El adăvgă că suntu anănghisiti apofasi ntrăoară cari s’ducă la ñicurarea pi şcurtu kirro a urdinarillei şi intearacţiunillei umani și arădăpsi ndauă:
“Easti regretabilu, ama lipseaşti s’apufusimu restricţii, cari restricţii va s’intră tru lucru di luni. Guvernul va s’apufusescu tru nai ma şcurtu kiro, nai ma amănatu viniri, multu concretu ţi restricţii intră tru practico, aesta după ţi Comitetlu Naţional şi experţăllii tru materie va s’apufusească minutişu aesti normi şi va li transpună, dealihea, şi tru limbaju juridicu. Voi s’dau maş ndauă exempli, cari nu suntu exhaustivi – va s’hibă restricţionată urdinarea noaptea, excepţie facu aţelli vaccinaţ şi atelli cari, cadealihea, cu legitimaţie di lucru, au unu lucru legitimu ti ndridzeari. Tru kirolu a dzuuăllei, la majoritatea activităţloru acceslu va s’hibă cu izini maş cu certificatlu veardi, ama atelli nivaccinaţ, ti amărtie, va s’aibă unu mănuclliu di restricţii. Aesti lucri, cadealihea, va s’hibă cama cu hăiri tu kirolu anda lumea akicăseaşti să s’vaccineadză şi va s’ascăpămu di aestă pandemie. Până atumţea vă oru la tuţ multă sănătate!”
Tutu di luni, purtarea a prusuppidăllei di protecţie agiundzi s’hibă obligatorie emu năuntru, emu şi di nafoară, ama elevlli ditu tuti ţiclurli di nviţămintu intră tru vacanţă kiro di dauă stămâñi. Stămâna aesta, România nregistră ţifri recordu di infectări și morţă di itia a Covid-19. Tutunăoară, ditu ahurhita-a campaniillei di vaccinari, tu 27 di andreu 2020, cama di 6 miliuñi di persoani loară serlu anti-Covid, cu multu sumu ținta pi cari autoritățli ș-u-avea pripusă tru ahurhită.
Autoru: Roxana Vasile
Armânipsearea: Taşcu Lala
