Nicolae Ciucă, diznău premieru număsitu
Tu bitisita a treiillei andamusi di consultări cu partidile parlamentare tru atelli aproapea trei meşi di cându USR iși di la guvernare, șeflu a statlui ălu număsi, diznău, s’adară un nău guvernu pi actualu ministru interimaru ali Apărari, Nicolae Ciucă. Klaus Iohannis: “Agiumsimu pi minduearea că tru Parlamentul ali Românie s-adră ună majoritati vărtoasă, ună majoritate ditu cari fac parti PNL, PSD, UDMR şi Gruplu a minorităţlor. Aestă majoritate ăñi pripusi ună numă di premier, pripuniri ţi u aprukeaiu. Neise, ălu număsescu domnul Nicolae Ciucă tră s’adară ună parei guvernamentală şi tra s’yină dinintea-a Parlamentului ali Românie tră votlu di pistipseari.”
Corina Cristea, 23.11.2021, 20:21
Tu bitisita a treiillei andamusi di consultări cu partidile parlamentare tru atelli aproapea trei meşi di cându USR iși di la guvernare, șeflu a statlui ălu număsi, diznău, s’adară un nău guvernu pi actualu ministru interimaru ali Apărari, Nicolae Ciucă. Klaus Iohannis: “Agiumsimu pi minduearea că tru Parlamentul ali Românie s-adră ună majoritati vărtoasă, ună majoritate ditu cari fac parti PNL, PSD, UDMR şi Gruplu a minorităţlor. Aestă majoritate ăñi pripusi ună numă di premier, pripuniri ţi u aprukeaiu. Neise, ălu număsescu domnul Nicolae Ciucă tră s’adară ună parei guvernamentală şi tra s’yină dinintea-a Parlamentului ali Românie tră votlu di pistipseari.”
Nicolae Ciucă fu număsitu candidat la funcţia di prim-ministru tru 21 di sumedru, ama ş-dipusi mandatul după ţi Guvernulu minoritar PNL-UDMR nu putu s’adună ună majoritate tru Parlamentu tra s’hibă votat. Tora, păzărăpserli pi lungu kiro cari s’ţănură ninti di consultări apufusiră cama pi largu programul di guvernare, naua structură a executivlui – majorată cu dauă portofolii -, cum și ţănearea pi arada a ipotisillei di prim-ministru di către PNL și PSD.
Nicolae Ciucă spusi că româñilli aşteaptă di la năulu guvern “stabilitate şi soluţii” tră ndridzearea zñiili ţi li adră pandemia şi criza energetică şi u spusi nădia că naua parei guvernamentală s’poată s’ahurhească “salami lucărlu” ahurhinda di gioi. Liberalii va s’aibă optu portofolii tru yinitorlu guvernu. Elli va s’aibă ma largu Externele, Internele, Educaţia şi Energia, cu idyilli titulari, şi va s’aibă şi alti patru portofolii, ntră cari Justiţia şi Ministerul a Fondurilor Europene şi Investiţiilor.
Nu tuț libearalii suntu, ama, haristusiţ. Tru partid suntu lideri cari critică turlia tu cari prezidentulu PNL ţănu păzărăpserli, ama Florin Cîţu spuni că ună coaliţie cu PSD nu easti nicondiţionată şi da asiguripseri că interesili a românilor şi stabilitatea financiară nu va s’hibă băgati tu piriclliu. Viniț ditu opoziție, social-democraţlli va s’aibă nauă ministere, nica şi Secretariatlu General a Guvernului. Easti zborlu ti portofolii importante, cum Finanţele, Apărarea, Transporturile ică Economia. Arada tu cari aţeali dauă partii va s’asiguripsească ipotisea di premier s-arădăpsi anamisa di nai ma disputati chestiuni.
PSD apruke pănu tru soni s’hibă la cumăndusearea aguvernului tăş dupu 18 di meşi, iara liderlu social-democrat Marcel Ciolacu exighisi că andruparea a pripunirillei PNL tră ipotisea di premier yini di itia că PSD aprăftăsi tru arada-a negocierloru să-şi caftă s’hibă aprukeati elementele di program, ahurhinda cu ateali ligate di pachetlu social. UDMR va s’aibă tu cabinetlu Ciucă ipotisea di vicepremier şi va li ţănă ş-ma largu ateali trei ministere ţi li ari tora: Dizvoltarea Regională, Mediu şi Sport. USR nu lo parti la consultărli cu șeflu a statlui, liderlu Dacian Cioloş spunănda că prezidentulu Klaus Iohannis ş-ari alăsată nanăparti rolu constituţional di păzărăpsitoru. Tutu ditu opoziţie, reprezentanţăllii AUR spusiră că nu va s’voteadză tru parlament băgarea tu ipotisi a yinitorlui guvernu.
Autoru: Corina Cristea
Armânipsearea: Taşcu Lala
