Performanţi româneşti la Roland Garros
Naima bună agiucătoari română di tenis, Simona Halep, 22 di an’i, alină, tru premieră, pi loclu trei tru clasamentul WTA, dat tru şteari luni, după naima bună performanţă dit cariera a l’ei, finala di Roland Garros. Tru aestă finală, dizvârtitâ sâmbătă, Halep fu aazvimtă di rusoaica Maria Şarapova. Simona Halep easti prota finalistă română la Roland Garros, după anlu 1980, cându managerlu a l’ei di tora, Virginia Ruzici, chiru, tru finală, mecilu cu americanca Chris Evert. Turnată, Bucureşti, după aţea dit soni a l’ei performanţă, Simona Halep declara a fanilor a l’ei:
Valentin Țigău, 10.06.2014, 11:50
Naima bună agiucătoari română di tenis, Simona Halep, 22 di an’i, alină, tru premieră, pi loclu trei tru clasamentul WTA, dat tru şteari luni, după naima bună performanţă dit cariera a l’ei, finala di Roland Garros. Tru aestă finală, dizvârtitâ sâmbătă, Halep fu aazvimtă di rusoaica Maria Şarapova. Simona Halep easti prota finalistă română la Roland Garros, după anlu 1980, cându managerlu a l’ei di tora, Virginia Ruzici, chiru, tru finală, mecilu cu americanca Chris Evert. Turnată, Bucureşti, după aţea dit soni a l’ei performanţă, Simona Halep declara a fanilor a l’ei:
“Fu nai ma marli meci dit carieara a mea, dit bana a mea, unâ finală di Grand Slam, prota pi cari nu va u agârşescu vârnâorâ. Mi hârsescu că escu dit România şi vă haristusescu, dit suflit, ti tut!”.
Ascensiunea ali Simona Halep fu, tru chirolu dit soni, multu pi iruşi: dit mai 2013, cându eara pi loclu 64 tru ieararhia mondială şi nu avea niţi un titlu WTA, agiucâtoarea amintă şapti titluri: Nurnberg, s-Hertogenbosch, Budapesta, New Haven, Moscova, Sofia şi Doha, ama chiru tru finala di Madrid, tut dinintea ali Marie Sharapova. Anlu aestu, ea easti cotată ca agiucâtoarea română cu nai cama bună plasari pi hiotea a chirolui, tru ierarhia feminină a tenislui mondial şi treia româncă dit istorie cari intră tru “top ten” mondial, după compatrioatili a l’ei, Irina Spârlea şi Virginia Ruzici.
Aţea di ma ninti gimnastă română, Nadia Comăneci angrâpsi, după finala di Roland Garros, că Simona Halep feaţi, prit agioclu a l’ei şi prit succeslu amintat, istorie. Ti performanţă!, greaşti Nadia, România easti pirifanâ cu tini. Haristusim!” Turneulu al’i deadi a tenismenâl’ei româna pistusinea că poati s-agiungâ nica şi ma ndzeanâ. Ea va s-ndregâ, tru chirolu ţi yini, ti agioclu pi iarbă, tră Wimbledon şi va ş-bagâ tru minti s-atacâ protili dauă poziţii tru ieararhia a tenislui feminin mondial, acâţati, pi arada, di americanca Serena Williams şi chinezoaica Li Na.
Amintată Constanţa — protlu câsâbă-portu românescu la Amarea Lae – Simona Halep agiumsi, ti prota oara pi chilimea di arinâ di Roland Garros tru 2008, cându amintă finala a giunioarilor. Victoria a l’ei ca junioarâ fu repetată, stămâna ţi tricu, di dublul Ioana Ducu – Ioana Roşca, chiro tru cari un altu tenismen român, Florin Mergea, agiumsi pi unâ ti anami performanţă, alinândalui, la Roland Garros, până tru semifinalili di dublu seniori, deadun cu croatlu Marin Draganja.
Armanipsearea: Tascu Lala
