Pistipsearea a cetăţean’ilor tru UE
Daniela Budu, 06.08.2019, 12:14
România easti pi loclu doi, isa-isa cu Portugalia, tru aţea ţi mutreaşti imaginea pozitivă andicra di Uniunea Europeană. Uidisitu cu un nău sondaj Eurobarometru tipusit luni, numirlu a românilor cari au ună imagine pozitivă ti Uniuni easti tru creaştire şi cama multu di media europeană – 60%, andicra di ună medie la nivel comunitar di 45%. Tut cu tutu, studiul spuni ti ună creaştiri vârtoasâ a duchimâsearilei pozitivâ a cetăţeanilor andicra di Uniunea Europeană tru tuti domeniile – di la economie la catastisea ali democraţie. Aşi, sondajlu spuni că ma multu di giumitate dit români au pistusini tru Uniunea Europeană şi suntu cu nâdie tru ţi mutreaşti catastisea a pâzarilei trâ lucru, comparativ cu unâ medie la nivelu ali Uniuni Europeanâ di 44%. Pistipsearea tru Uniune criscu tru 20 di stati membri şi easti ma largu ma mari andicra di aţea tru guvernili icâ parlamentili naţionale. Nai cama mâri niveluri s-nregistrarâ tru Lituania, Danemarca şi Estonia.
Minduescu tra s-aibâ pistusini tru Uniune cama di giumitati dit aţlI ţi apândâsirâ dit aţeali 15 di vâsilii, ntrâ cari şi România. Majoritatea a europeanilor, 61%, suntu tora cu nâdii tu ţi mutreaşi yinitorlu ali Uniuni, chiro tru cari maşi 34% suntu fârâ di nâdii. Nâdia easti nai cama mari tru Irlanda, Danemarca, Lituania şi Polonia. Nai cama scădzuti niveluri s-nregistrează tru Regatlu Unit şi tru Franţa. Ma multu di giumitati ditru cetăţenili a vâsiliilor membri suntu cu minduearea că boaţea a lor angreacâ tru Uniunea Europeană, situaţie cari yilipseasti unâ creaştiri em andicra di toamna ţi tricu em şi andicra di cirişar 2014. Tutunâoarâ, ma multu di giumitati ditru europeni declară că suntu haristusiț di turlia tru cari lucreadzâ democrația tru Uniunea Europeană, scorlu hiinda nai cama mari nregistrat dit toamna a anlui 2004 până tru aistu chiro. Nai cama scâdzuti realizări ali Uniuni suntu cetăţenia europeană şi libirtatea di urdinari, nica lugurseaşti majoritatea a oaminilor.
Pi nivel european şi naţional prota cilâstâseari armâni imigraţia, spusâ di 34% dit ateli cari apăndâsirâ la ntribări, nivel tru scădeari andicra di toamna a anlui ţi tricu. Anamisa di protili constatări a studiului s-arâdâpsescu un agiutor record trâ moneda euro şi transformarea a alâxerlor climatiţi tru a daua cilâstâseari majoră la nivelu ali Uniuni Europeanâ, după imigraţie. Neise, tru tuti aţeali 28 di state membri, cama di giumitati ditru aţelI ţi apândâsirâ lugursescu că suntu cetăţeani ali Uniuni Europene. Aesti suntu nai cama buni rezultate di la sondajlu Eurobarometru dit cirişar 2014, adratu ninti di intrarea pi ipotisi a Comisiilei Juncker. Sondajlu fu adratu după alidzerli europene, anamisa di 7 di cirişar şi 1 di alunar 2019, tru tuti aţeali 28 di stati membri ali Uniuni şi tru ateali ţinţi vâsilii candidate (Macedonia di Nord, Turchia, Muntenegru, Sârbia şi Arbinişa).
Autor: Daniela Budu
Armânipsearea: Taşcu Lala
