Prilundzearea-a catandisillei di alertă tru România
Leyla Cheamil, 10.06.2020, 18:51
După unâ andamusi cu premierlu Ludovic Orban și ma mulță miniștri, caplu a statlui român, Klaus Iohannis, dimândă, marță, năi meatri di relaxari a restricțiilor ţi eara băgati tra s’curmă arăspăndearea-a năului coronavirus. Prezidentul spusi că, după 15 di cirişar, nâpoi va s’hibâ dişcllisi mall-urile, ama fără restauranti şi fără locuri di agiocu, cum și sălliurli di fitness şi piscinili exterioari, ama cu tin’isearea-a nâscântor regulamenti sanitari speţiali și a nâscântor normi di distanţari fizică stricti. Tutunâoarâ, va s’aibâ câbili ti evenimenti privati, ama nu şi publiţi, cu nai cama multu 20 participanţâ, cara aesti va s’ţânâ nâuntru şi 50 cara va s’hibâ nafoarâ. Tru idyiul kiro, tra s’agiutâ părinţâlli cari lipseaşti s-ducâ la lucru şi tru perioada-a vacanţilor şcolari, va s’aibâ câbili trâ dişcllidearea diznău after-school-urli, grădiniţili şi creşili privati. Cu tuti aesti, prezidentul Klaus Iohannis lugurseaşti câ easti ananghi, ma largu ti meatri di precauție. Catandisea di alertă, spusi caplu a statlui, lipseaşti s’hibâ prilundzitâ şi după oara a bitisearillei a llei, tu giumitatea a aluştui mesu, di itia câ nu ari unâ scâdeari cama mari a numirlui di lândizdâri năi. Prilundzearea a catandisillei di alertă ţi fu apufusitâ tu giumitatea-a meslui mai, după scutearea a aţillei di ananghi apufusitâ tu 16 di marţu, ţâni, ama di votlu a Legislativlui. Trâ aţea, prezidentul feaţi cllimari câtră parlamentari s-aproaki prilundzearea-a catandisillei di alertă.
Ia ţi spusi prezidentul Klaus Iohannis: “Tin’isiţ parlamentari, s’hiţ responsabili. S’minduiţ că viruslu nu keari pritu un vot tru parlamentu, ama cara va s’ndrupâţ guvernul, atumţea putem s’controlăm hâirlâticu – şi scoasimu tu videalâ – aestă arăspândeari a epidimiillei. Vahi, mutritu, un studiu multu nău a unui institut cu anami di Londra. Nâ spuni că, fără aesti meatri tru lumi, maxus tru Europa, vrea s’avem miliun’i di morţâ. Di itia, câ bâgăm noi, tru România, di cu kiro aesti meatri nâ feaţi s’vigllemu arăspândearea-a epidimiillei cât multu putu s’hibâ sum controlu.” Hâbarea-a prezidentului fu aprukeatâ cu critiţ di opoziția anclligatâ anvârliga di PSD. Social democrațlli feaţirâ cunuscut, prit boaţea-a purtătorlui di zboru a partidlui, Lucian Romaşcanu, că nu va s’da votlu ti prilundzearea-a catandisillei di alertă: “Pripunirea-a prezidentului nu easti ti aprukeari, nai ma pţânu ditu videala-a itiilori ţi nâ li dimândă. Eali nu suntu andrupâti ici, vără turlie ditu videala-a oamin’iloru di ştiinţă, a specialiştilor tru epidimiologie.” Nica şi Pro România dimândă că parlamentarlli a llei nu va s-da votlu ti prilundzearea a catandisillei di alertă, a deapoa Uniunea Salvaţi România condiţioneadză votlu di pârâstisearea a nâscântor dati limbidz mutrindalui evoluţia a catandisillei epidimiologhiţi. USR lugurseasti cama uidisitu s’hibâ apufusitâ catandisea di alertă maşi tru localităţ iu ari piriclliul di infectari cu viruslu SARS CoV-2.
Ngrâpsearea: Leyla Cheamil
Armânipsearea: Taşcu Lala
