Prognoza ali Bancâ Mondialâ ti Românie
Icunumia ali Românie va s-dânâseascâ, estan, luyurseaști Banca Mondialâ.
Tașcu Lala, 05.07.2026, 23:45
Icunumia mondialâ va s-aibâ, estan, unâ crişteari cama ñicâ, di 2,5%, andicra di unâ crișteari di 2,6% minduitâ tu meslu yinar, di sibepea a polimlui dit Orientul di Mesi. Luyursearea iasi tu padi tu ațel dit soni raportu ali Bancâ Mondialâ. Uidisit cu spusa ali instituţie finanțiarâ internaţionalâ, ma s-facâ dealihea, va s-hibâ cama scâdzuta crișteari icunumicâ di anda ahurhi pandemia, tu bitisita a anlui 2019. Iara lucrâli pot s-aspunâ nica ma lai, fați tâmbihi Banca Mondialâ: ași, expansiunea poati s-ayâliseascâ la mași 1,3% maca fâțearea a stogurlor cu energhie va s-hibâ cama ñiț și yin cu un stres multu mari pi pâzărli finanțiari.
Tu ți mutreaști România, Banca Mondialâ yini cu unâ luyurseari congruentâ i multu aproapea di luyurserli alântor instituţii di nuntru şi internaţionali. Uidisit cu spusa ali Bancâ Mondilâ, icunumia româneascâ va s-aibâ estan, unâ crişteari zero, andicra di unâ crișteari di 1,3% luyursitâ tu meslu yinar. PIB-lu ali Românie va s-creascâ cu 1,7% anlu ți yini, a că tu meslu yinaru Banca Mondialâ prognoza unâ cișteari di 1,9%. Tu 2028, icunumia româneascâ va s-creascâ cu 2%. Dit meslu yinar, cama laili luyurseri furâ ti Românie, Turchie, Republica Moldova şi Ucraina, prota-chi-prota di itia a şoclui a pâhadzlor la materiili primi, pi ninga evoluţiili spețifiți ti cathi vâsilie, aspuni raportul ali Bancâ Mondialâ.
Tu chirolu 2026-2028, politica fiscalâ easti aştiptatâ s-andrupascâ tu unâ mari misurâ criştearea tu cama multili icunumii. Exichili fiscali va s-armânâ mări, di cara s-fac dipriunâ presiuni pi pâhadz, baș pi ațeali dit dumenea ali apârari. Spaţiul fiscal ñic, maxus tu Muntenegru, România şi Ucraina, va s-ângârdeascâ, vahi, capațitatea autorităţlor ta s-absoarbâ aestu şoc, fați tâmbihi Banca Mondialâ. Di pțân chiro, Comisia Naţionalâ di Strateghii şi Prognozâ luyursi ti anlu 2026 unâ crişteari icunumicâ di mași 0,1%, alâxindalui pi scâdeari, cu 0,9 puncti proțentuali, luyursearea faptâ ma ninti.
Luyurserli ti un chiro di mesi s-feațirâ tu unâ catastisi gheopoliticâ cu zori, iu țiva nu sâ știe salami, ș-aestâ catastisi easti ma greauâ di cara ceamauna dit Orientul di Mesi s-adră ma lai ș-aestu lucru dusi la un şoc energhetic mari pi pâzarea globalâ. Efectul inflaţionistu dat di criștearea a pâhadzlor la combustibili vini pisti gairețli interni di andridzeari a zigâllei macroicunumicâ prit duțearea ma largu a bâgarillei tu practico a misurilor di anvârtușari bugetarâ, ațea ți dusi la aspârdzearea a luyurserilor ti estan, mindueaști CNSP. Ti un chiro di mesi, aesta nu alâxeaști luyurserli ti criştearea icunumicâ, ti chirolu 2027-2029, ritmolu di mesi ti cathi an ti Produslu Internu Brut hiindalui di 2,2%, ți easti țânut, ma multu, di criștearea ma largu a proțeslui investiţional. Dupâ scâdearea dit 2026, consumlu privat va s-creascâ cu un ritmo di mesi ti cathi an ți va s-hibâ pisti ațel a PIB-lui, di cara va sâ scadâ pri-ayalea efectili a ânvârtușarillei bugetarâ.
Autor: Ștefan Stoica
Apriduțearea: Mirela Biolan
