Proiectul a nauâllei strateghie di apărari a vâsiliillei
Daniela Budu, 28.05.2020, 17:57
Tru România, Consiliul Suprem di Apărari a Vâsiliillei vulusi, n’ercuri, proiectul ti Strateghia Naţionalâ di Apărari tră perioada 2020 — 2024, document cari lipseaşti s’hibâ pitricutu ti votari și la Parlamentu. Prezidentul Klaus Iohannis declară că strateghia fu ndreaptâ tru contextul a unei pandemii cari plâscâni pritu unâ criză economică ahândoasâ şi alâxi ligaturli di puteari. Uidisitu cu șeflu a statlui, România fu tu catastisea ta s’tânâ cheptu tru şcurtu kiro a aliştei pandemii, a deapoa perspectiva a unei evoluţii ticlicâ a viruslui obligă statlu român s’ducâ ma largu meatrili tra s’creascâ axia di kiverniseari a unâllei ahtari crizâ pi ma multi planuri.
Klaus Iohannis spusi că Strateghia Naţională di Apărare a Vâsiliillei tră yinitorlli patru an’i lucreadzâ cu idyiul conţeptu di securitati naţională lârdzitâ, bâgatu şi zuyrâpsitu tru preţedentul documentu. Pi ningâ apărarea armată, strategia ari tu planu şi alti dimensiuni, catacum politica externă, arada publică, educaţia, sănătatea, economia, fisea, securitatea energhetică icâ securitatea cibernetică. Caplu a statlui nica spusi că documentul ari la thimelliu conţeptul a unei vâsilie cari, pritu instituţii democratiţi vârtoasi, veaglle şi’lli apără tuţ cetăţean’illi.
Klaus Iohannis: ”Naua strateghie aduti apandisi ti ntribărli esenţiale mutrinda obiectivili a noastri naţionale di amprotusa tră asiguripsearea a securitatillei ali Românie şi a cetăţean’ilor a llei şi spuni ţi avemu ti adrari tra s’li băgămu tu lucru. Politiţli publiţi ditu dumenea a securitatillei naţionalâ va s’hibâ minduiti şi bâgati tu practico, avândalui ca beneficiar di bitisitâ cetăţeanlu, căte cafi român lipseasti s’dukeascâ că bâneadzâ tru un mediu sigura şi s’aibă pistusinea că instituţiile lu’apără şi lu’veaglle”.
Parteneriatlu Strategic cu Statili Uniti ali Americâ, ama şi apartenenţa la NATO şi la Uniunea Europeană nâpoi suntu spusi tru documentu ca sturi a politicâllei externâ şi di securitati. Prezidentul cundille că Strateghia Naţională di Securitate tră yinitorlli patru an’i caftâ unâ nauă abordare, di itia a ligâturloru cama slabi anamisa di Alianţa Nord-Atlantică şi Federaţia Rusă, di prolifeararea-a terorismului, di fuvirserli hibridi şi di ateali ţibernetiti. Tru arada-a idyillei andamusi, Consiliul Suprem di Apărari a Vâsiliillei feaţi isapi şi aprobă câ Forţili Armate ali Românie cari pot s’hibâ bâgati la dispoziţie tra s’llia parti la misiuni şi opearaţii nafoara-a teritoriului a statlui anlu ţi yini, cum și programlu mutrindalui alâxearea, dizvultarea și armâtusearea a Askerillei ali Românie tră yinitorlli an’i și tru perspectivă.
Ngrâpsearea: Daniela Budu
Armânipsearea: Taşcu Lala
