Reacţii după traghedia ditu mãhãlãlu Rahova
Ma multi meatri furã loati di autorităţ trã oamiñilli zñiipsiţ dupu explozia di viniri, di București.
Tașcu Lala, 20.10.2025, 19:56
Dimarhia ali Capitalã ndreapsi 440 di locãri di durñeari ti oamiñilli zniipsiţ di explozia ditu mãhãlãlu bucureștean Rahova, ditu aeşţã vãrã 80 furã bãgaţ tu hoteluri. Anamisa di aeşţã ari cilimeañi şi oamiñi tu ilikie. Di itia a fãnicolui murirã trei oamiñi. Administraţia locală easti ndreaptã s’da şi pãradz ti niki trã aţelli ţi voru s’hibã tu aestã aradã. Bloclu cu optu patomati tru cari s-feaţi fãnicolu easti greu aguditu, iarapoi oamiñilli numata pot ta s’toarnã tu apartamentili a lor, spuni raportulu preliminaru a Inspectoratlui di Statu tru Construcţii. A deapoa, specialiştilli lugursescu cã ma s’nkiseascã cu znueari nu ari hãiri icunomicu şi ari cãbilea ti piriclliuri mãri trã pareiili di intervenţie.
Dimarhulu agiutãtoru ali Capitalã, Stelian Bujduveanu, spusi că, andicra di isãkili a experţãloru şi după ţi va s’hibã bitisitã ancheta, poati s’hibã acãţatã tu isapi surparea aluştui imobilu. Tru dzãlili ţi yinu, dimarhia va s’aducã cu contractu unã companie cari va s’mirimitiseascã şi va s’adunã cumãţli di betonu ţi suntu cu priclliulu tra s’cadã pi napandica, a deapoa, sumu cumandulu a aţiloru di la IGSU, oamiñilli nãpoi va s’poatã s’toarnã tru apartamentili a lor tra ş-llia bunurli di mari aananghi. Toradioarã, dimarhia ahãrdzi ditu pãradzlli di ananghi aproapea 3 miliuñi di lei (vãrã 600.000 euro) trã s’agiutã oamiñilli ţi eara purtaţ după explozia tu cari avea şi mulţã pliguiţ, ditu aeşţã unu fu purtatu la un spitalu di arşi ditu Austria. Pãradzlli va lã si da ti hrană, yitrii şi lucri di mari ananghi, nica şi ti consilierea psihologhică, ama şi ti scutearea diznãu a nãscãntoru acti, ţi li cãftarã pãnã tora 20 fumelli.
Tru aestu kiro, restricţiili temporari cu urdinarea armãnu tu practico tru ma multi locãri di tu perimetrul zñiipsitu di fãnico, iarapoi urdinarea easti faptã pi cãlliuri alternativi. Şi urdinarea a oamiñiloru easti apridunatã pi gãdrãmãlu di ningã imobilili zñiipsiti. Brigada Rutieră ndreapsi unã cunaki mobilã pritu cari lã si da a oamiñiloru autorizaţiili ti znuearea aftukinatloru ţi avurã zñie tru fãnico. Pãnã tora deadirã dzăţ di ahtări acti ţi suntu ananghi la service-urli auto. Anchetatorlli ma largu au muabeti cu marturlli tru dosarlu dişcllisu toradioarã in REM (viglleari penalã contra a faptãllei), dupâ ţi administratorlu a bloclui fu gritu diznãu ti declaraţii. Unã ipoteză acãţatã tu isapi easti că fãnicolu s’feaţi di itia cã s’adunarã multi gazi.
Dimarhulu agiutãtoru ali Capitalã spusi că tuti lucrărli, mutrinda bloclu şi viţinata, va s’nkiseascã cãndu va s’hibã bitisitu lucãrlu cu adunarea a proviloru. Lucrãri di znueari va s’aibã ananghi şi la liceulu „Dimitrie Bolintineanu”, ţi easti niingã bloclu zñiipsitu, a curi elevi va s’nveaţã stãmãna aesta online a deapoa, andicra di cãtu kiro va s’hibã ananghi ti znueari, ari cãbili s’hibã mutaţ tru alti unităţ di nviţãmintu.
Tutunãoarã, ministerlu ali Energhie ari naeti s’pripunã alãxeri tru nomuri, andicra di isapea cu Ancheta mutrinda fãnicolu. Aeşţã au tru planu firmili icã entităţli cari lipseaşti s’llia meatri tu catandisea di ananghi dupu cãftãrli fapti di oamiñi di itia cãţe ari gazi ţi iesu tru vimtu, aţea turlie cã aeşţã s’nu arucã borgea pi pãltãrli alãntui.
Autoru: Mihai Pelin
Armãnipsearea: Taşcu Lala
