România cama aproapea di OCDE
Cara va ș-țânâ ritmolu di bâgari tu practico a reformilor di cari ari ananghi, România poati s-hibâ arada di alanti 38 di vâsilii membri ali OCDE, tu anlu ți yini.
Tașcu Lala, 07.10.2025, 16:07
„Ti Românie, aprukearea la OCDE easti unu scupo strateghic”, dzâsi , luni, prezidentul Nicușor Dan, dupâ andamusea ți u avu, București, cu secretarlu gheneral ali Organizație ti Cooperari și Dezvoltari Icunumicâ, Mathias Cormann. Uidisitu cu spusa a șeflui a cratlui, aprukearea „easti nai ma vârtoasa pricunușteari internaționalâ că bânămu tu unâ vâsilie dezvoltatâ, iara experiența alântor vâsilii aspuni că dupâ aprukeari s-fați unâ crișteari icunumicâ cabaia mari” – anyrâpsi elu pi unu singiru di suțializari.
Prezidentul luyurseaști, tutnâoarâ, că aprukearea „va nâ adarâ ma competitivi ti investițiili xeani ș-va s-creascâ sinferlu a investitorilor instituționali ti noi”. Nicușor Dan dzâsi nica că proțeslu s-duți ninti multu ghini ș-că, ma s-țânemu aestu ritmo, România va s-hibâ aprukeatâ tu organizație anlu ți yini. „OCDE easti organizația ți adunâ nai ma dizvoltatitili icunumii ș-nai ma vârtoasili dimucrații ditu lumi”, adâvgă prezidentul.
Tu arada a andamusillei cu secretarlu gheneral ali organizație, ș-premierlu Ilie Bolojan deadi asiguripseri că „România va s-adarâ tutu” ta s-hibâ aprukeatâ di OCDE. „Dupâ ți agiumsimu membri ali NATO ş-ali Uniuni Ivropeanâ, aprukearea la OCDE easti ma largu unu scupo di prota thesi. Organizaţia ti Cooperari şi Dezvoltari Economicâ va s-hibâ nica unâ ancorâ ti modernizarea a vâsiliilei a noastâ ş-ti anvârtușarea a cratlui tu arada a dimocraţiilor stiriusiti”, dzâsi Ilie Bolojan. Âlli pitricu hâbari a secretarlui gheneral ali OCDE că, la trei añi di la aprukearea a planlui di andridzeari, România easti tutu ma aproapea ta sâ-și umplâ scupolu.
Lârdzearea a OCDE easti un lucru di prota thesi, dzâsi, tu arada a lui, Mathias Cormann, di cara s-va unâ lârdzeari a standardilor ş-a buniloru practiț. ”Năilli membri aducu unâ minduitâ nauâ și experienţi tu ți mutreaști politițili şi, avemu umutea, că agiutâ la fâțearea ma vârtoasâ a relevanţâllei ş-a lucurlui a nostu. România ari unu rolu di simasie tu aestâ reghiuni, tu Ivropa ditu Apiritâ” – cundille ufițiallu. El adâvgă că România avu “crișteri ti anami” tu bâgarea tu practico a reformilor ți s-caftâ ș-tora easti tu partea ditu soni a mutrearillei a llei tehnicâ. Dupâ spusa alu Mathias Cormann, 15 ditu ațeali 25 di comiteti di mutreari pitricurâ, kiola, isăki hâirlâtiți ti vâsilia a noastâ ș-deadi asiguripseri că aprukearea va s-aibâ hâiri ti București, di la anvârtușarea a chivernisillei ș-a pistillei a investitorilor, pânâ la fâțearea ma bunâ a banâllei a oamiñiloru.
Mathias Cormann deadi tu șteari că analiza icunumicâ ali Românie va s-hibâ scoasâ tu padi tu meslu marțu 2026, București, ți easti jgllioata ditu soni ditu aestu proțesu di aprukeari. Lipseaști s-dzâțemu că statutlu di membru ali OCDE va u adarâ România s-hibâ di pistusini ti soțlli di emburlâki, lucru ți va s-ducâ la criștearea a fluxurilor di capital ș-a investițiilor xeani directi tu vâsilie.
Uidisitu cu spusa a ministrului ti Lucri di Nafoarâ di București, unâ tindeari a pistillei va s-veadâ pritu criștearea a rating-lui di vâsilie, lucru ți easti di simasie ti aprukearea a pâzărilor finanțiari internaționali. Ma multu, aprukearea la OCDE va s-andrupascâ criștearea a pâzarillei di capital ditu Românie și anvârtușarea a statutlui a llei di pâzari emergentâ, dimi di pâzari ți s-alâxeaști di la icunumie pi crișteari la icunumie dizvultatâ, cata cumu și bâgarea arada ali Românie cu pâzărli ditu spațiul ditu nafoara ali Evropâ.
Autor: Daniela Budu
Apriduțeara: Mirela Biolan
