România şi catastisea dit Afganistan

Daniela Budu, 23.08.2017, 15:38

Militarl’ii a Batalionlui di Infanterie Protecţia Forţei Brave Hearts Focşani li prilo misiunile româneşti tru teatrul di operaţiuni dit Afganistan. Efectivele di militari di Focşani, cari li alaxira ateali a Batalionlui 151 Lupl’i Lai di Iaşi, va s-l’ia parti, kiro di şase mesi, la misiunea NATO Resolute Support. Atel’i cama di 600 di askirladz români va s-aiba prota s-prota lucarlu ti securizaria a bazal’ei di Kandahar, executândalui patrule deadun cu askirladzl’I dit coaliţie, armata şi poliţia afgană. Militarii români va s-asigruripseasca şi securitatea a nai ma marlui aeroport dit sudlu a Afganistanlui. Regiunea armâne una cu probleme tru atea ti mutreasti securitatea. Atel dit soni incidentu tru cari fu pliguit şi un militar român s-feati cu daua staman’I ninti. Uidisitu cu isakili di la Ministerlu ali Apărari di Bucureşti, 25 di militari români murira tru kirolu a misiunilor dit Afganistan, la cari l’ia parti dit 2001. Alţa cama di 100 di militari români fura pliguiţ până tora tru aestu teatru di operaţiuni.

Alaxearea di askeri româneşti dit Afganistan s-fati tru contextul tru cari, la ahurhita a stămânal’ei, prezidentul american Donald Trump dimanda că va s-da sila ali campanie militară contra a insurgenţalor talibani. Liderlu di Casa Albă exclusi iti tradzeari napoi a SUA dit Afganistan, exprimânda-lui candasearea că una ritradzeari irusi dit aestă vasilie poati s-adara un vid di cari va s-ufiliseasca teroriştii, em atel’I dit Al-Qaida, em şi dit pareia Stat Islamic. Pentagonlu lipseasti s-apufuseasca câti trupe suplimentari va s-pitreaca tru Afganistan kiro tru cari andreadzi ma largu un plan, declara şi secretarlu american ali apărari, James Mattis. Uidisitu cu ma multa ufitial’i americani, Donald Trump al’I deadi cumandu/ putearea a aistui s-pitreă aproapea 4.000 di militari americani, cari va s-ndrupasca atel’I aproapea 8.400 disvartiţ tru aestu kiro tru Afganistan.

România saluta, deadun cu alţa aliaţ NATO, habarea a prezidentlui american. Ministrul ali apărari, Adrian Ţuţuianu, cundil’e că şi Bucureştiul, cari easti paturlu contributor cu trupe dit Alianţa Nord Atlantică, poati tra s-li creasca efectivele la misiunea Resolute Support. Conflictul dit Afganistan easti nai ma lungu dit istoria modernă a Statelor Unite şi ankisi dupu atacurile Al-Qaida dit yismaciuni 2001, tru condiţiile tru cari liderlu a pareiil’ei teroriste, Osama Bin Ladit, era aapanghisitu di regimlu taliban di atumtea. Talibanii fura azvimta ntraoara di forţele americane, ama ankisira una insurecţie, a deapoa tru perioadă dit soni aminta tut ma multu teren. Misiunea NATO s-bitisi ufitial tru Afganistan tru insita a anlui 2014, a deapoa tru kirolu di tora atel’I aproapea 13.500 di militari, nai cama multa americani, andregu si consiliadză fortale di securitate afgane.

Autor: Daniela Budu

Armanipsearea: Tascu Lala