Sentinţi tru dosarlu „Gala Bute”
Florentin Căpitănescu, 29.03.2017, 12:31
Tra Elena Udrea, fostu ministru a Dezvoltaril’ei tru Guvernul di dreapta di Bucureşti dit perioada 2008 — 2012, problemili judiciare s-acutizara unaoara cu sentinţa ti al’I si deadi, tru prota instanţă, tru dosarlu cunuscut sum numa “Gala Bute”. Ea fu condamnată di Analta Curte di Casaţie şi Justiţie di Bucureşti la şasi an’i di hapsani cu executari şi lipseasti s-palteasca aproapea trei miliun’I di euro, tra zn’ie. Udrea, pitricută tru giudico tru apriliu 2015, fu aflată cabati tra loari arusfeti şi abuz tru lucru. Al’iumtrea, ea fu achitată tra stepsurli ca ufilisi documenti ica declaraţii falsi, inexacti ica incompleti şi ca ari amintata fara s-aiba ndreptu fonduri europene. Tru dosar nica fura anchetaţ, ntra alţal’i, un fostu prezidentu a Federaţiil’ei Români di Box, Rudel Obreja, condamnat la tinti an’i cu executari, şi un ex-ministru ali Economie, Ion Ariton, achitat. Procurorl’i al’i stipsira că ufilisira paranom fonduri publiti tra finanţarea a unei gala di box la cari lo parti fostul campion mondial Lucian Bute.
Alanta inculpaţ dit dosar cari ş-pricunuscura faptili loara pideapsi cu suspendari. Elena Udrea declara că sentinţa tru Dosarlu Bute nu easti una niandriptati, ama easti un abuz şi una “mascaradă”. Aestu dosar confirmă faptul că Direcţia Naţională Anticorupţie (DNA), haidipsita constant pi creaştit di Comisia Europeană tru rapoartili mutrindalui imnaticlu a justiţiil’ei româneşti, s-duti ma largu scupolu pripus. Condamnarea a Elenal’ei Udrea, un aprucheat aliat politic a fostului prezidentu Traian Băsescu, easti nai ma recentă dit un singir di condamnări a nascantor persoani publiti dit România, lugursită una di nai cama corupti vasilii dit UE. Ligatura spetială cu Traian Băsescu fu apuntea cari u agiuta Udrea s-agiungă până tu nai ma marea scara a ipotisil’ei di ministru. Nica s-ma multu.
Analiştil’i politit, la unison, lugursea că aesta, di furn’ia a trecal’ei buna ti u avea cu fostul prezidentu, eara nica si numirlu una tru guvernu, nintea a fronimlui premier Emil Boc, tru una perioadă tru cari România deadi cheptu cu criza economico-financiară. Tru perioada atea, 2008 — 2012, presa di Bucureşti angrapsea constantu şi tra influenţa babageană ti u avea Udrea prit ipotisea ti u avea tru guvernu, ti furn’ia ca portofoliul a Dezvoltaril’ei chivernisea multi s-cama multi fonduri. Tut presa dit atel kiro spunea că tru cundil’ilu a l’ei sidea un bairu di proiecti, di ma n’ică ica ma mari anvergură, şi că apofasili a l’ei eara favorabile, neise tra aleptal’I locali cu cari eara şi sutata tru PDL, ti cu chirolu chiru. Cum chiru dit politică, tru an’il’i dit soni, şi Elena Udrea, ti pari s-cilastaseasca, tra ponlu judiciar a prestaţil’ei a l’ei ministeriala.
Autor: Florin Capitanescu
Armanipsearea: Tascu Lala
