SUA 250 – Suțatâ strateghicâ româno-americanâ
Bucureștiul și Washington-lu aspusirâ nica unâ oarâ suțata strateghicâ, tu arada a yiurtusearil’ei a 250 di añi di la independența a SUA.
Tașcu Lala, 11.08.2026, 23:02
Prit plâscâneri di artifiții, paradi, agocuri, astrițeri și andamusi di familie, americañil’i yiurtusirâ cu mari sâltânati âncl’idearea, tu 4 di alunar, a 250 di añi di la hopa ditu 1776, cându Congreslu Continental apruche Declaraţia di Independenţâ a aților 13 colonii britaniți dit America di Ncheari. Avândalui unâ cuvendâ la Muntili Rushmore, ațea oarâ ti anami plichisitâ tu piștireauâ şi ahârdzitâ a pârinţâlor thimil’iusitori a Statilor Uniti, liderlu di la Casa Albâ zburâ ti SUA ca ti unâ mileti ți nu tradzi mânâ, ama ș-ți nu aluthuseaști canâoarâ: „Amintarea şi duțearea ma largu ali mileti americanâ sum Dumnidzău easti cama bunlu ș-ma ti ciudii lucru ți s-ari faptâ vârâoarâ pi aestâ planetă di mâñâ umineascâ”, dzâsi Donald Trump, ți yiurtusi anamea americanâ şi thesea di lider tu lumi.
“Româñil’i suntu pirifañi s-hibâ arada di America ca aliat, soț şi partener di pistusini ti axiili ți nâ aduc aproapea anaparti di Atlantic”, s-aspuni tu mesajlu di urari pitricut di Ambasada ali Românie Washington. Tu unâ postari tu limba anglicheascâ pi Facebook, Ambasada aduți aminti că „aestâ yiurtuseari nu esti maș un semnu di tiñie ti amintarea ali unâ mileti, ama şi putearea tu chiro a axiilor ți u plichisirâ tu 250 di añi: libirtatea, anacra, dimucraţia şi pistea că un yinitor cama bun poati s-hibâ adrat prin viziuni ş-apofasi”. „Ti Românie, easti, tutnâoarâ, unâ arasti ta s-yiurtuseascâ unâ suțatâ ş-un parteneriat strateghic cu Statili Uniti, cari s-adrarâ tut ma vârtoasi cu iți bârnu ți vini”, s-aspusi nica tu mesaj.
Tu un editorial tipusit di pțân chiro pi frândza a unlui canal media american cu mirăchi conservatoari, prezidentul ali României, Nicuşor Dan, luyursi, tu idyiul chiro, că cl’irunumia a Statilor Uniti treați cu multu di sinurli a l’ei ișiși şi easti scrisâ tu isturia şi mirăchili a multor mileț ți u mutrirâ America ca un izvur di fotisi şi umuti. Şeflu a cratlui românescu s-dusi ș-la andamusea andreaptâ ninti di chiro di Ambasada americanâ di Bucureşti, iu u aspusi Declaraţia di Independenţâ a Statilor Uniti ca un reper istoric.
Cu furñia a âncl’idearil’ei a 250 di añi di la Dzuua a Independenţâl’ei ali mileti americanâ, ambasadorlu SUA tu Bucureşti, Darryl Nirenberg, âl’i pitricu ali Românie calisearea ta s-hibâ arada di Freedom 250, anchisitâ prit cari Statili Uniti scot tu migdani la scarâ globalâ umutili a l’ei thimil’iusitoari: libirtati, dimucraţie şi independenţâ. „Am nâdia că România va s-hibâ arada di Statili Uniti la yiurtusearea a pârinţâlor a noşțrâ thimil’iusitori, tiñisindalui lunga suțatâ anamisa di populu american ş-ațel românescu şi s-angâsâiascâ bârnili ți yin s-ducâ ma largu umutea a libirtatil’ei tu tutâ lumea”, s-aspusi tu mesajlu a diplomatlui american.
Autor: Corina Cristea
Apriduțearea: Mirela Biolan
