SUA şi România
Cu afireari icâ nu, un soţ lipseaşi s-ţâ spunâ totna averlu. Aflat, stămâna aeastâ, Bucureşti, viţeprezidentul american, Joe Biden, pitricu a român’ilor, lâhtârsiţ di criza dit Ucraina viţină, solidaritatea pân di mardzinâ a Statilor Unite. Easti unâ borgi sâmtă s-him deadun cu român’il’ ş-cu NATO — spus Biden, hâbârisindalui criştearea a numirlui di ascheri americani dizvârtiti tru regiune, apofasi, ţi pari s-hibâ obligatorie tra s-u apridunâ iruşea di aputruseari ali Rusie. Tut viţeprezidentul feaţi timbihi, ama, că, di nai multili ori, inamiţl’i interni a unei vâsilie suntu idyealui di piricl’iu ca aţel’i di nafoară. Nai cama di simasie yişteari tră vâsiliili NATO u reprezintă suţiitatea transparentă, iu aruşfetea easti lugursitâ un duşman, Guvernul easti echitabil şi tin’isitu, iara oamin’l’i suntu aprucheaţ cu nâmuzi — spusi el, tru un zbor ţi lu gri tră societatea ţivilâ românească.
Bogdan Matei, 22.05.2014, 12:22
Cu afireari icâ nu, un soţ lipseaşi s-ţâ spunâ totna averlu. Aflat, stămâna aeastâ, Bucureşti, viţeprezidentul american, Joe Biden, pitricu a român’ilor, lâhtârsiţ di criza dit Ucraina viţină, solidaritatea pân di mardzinâ a Statilor Unite. Easti unâ borgi sâmtă s-him deadun cu român’il’ ş-cu NATO — spus Biden, hâbârisindalui criştearea a numirlui di ascheri americani dizvârtiti tru regiune, apofasi, ţi pari s-hibâ obligatorie tra s-u apridunâ iruşea di aputruseari ali Rusie. Tut viţeprezidentul feaţi timbihi, ama, că, di nai multili ori, inamiţl’i interni a unei vâsilie suntu idyealui di piricl’iu ca aţel’i di nafoară. Nai cama di simasie yişteari tră vâsiliili NATO u reprezintă suţiitatea transparentă, iu aruşfetea easti lugursitâ un duşman, Guvernul easti echitabil şi tin’isitu, iara oamin’l’i suntu aprucheaţ cu nâmuzi — spusi el, tru un zbor ţi lu gri tră societatea ţivilâ românească.
Alumta contra ali aruşfeti şi anvârtuşearea a statlui di dreptu suntu — nâpoi aduşi aminti Biden — lucri di amprotusa trâ dezvoltarea yinitoare a vasiliil’ei şi garanţia tră suveranitatea naţionalâ. Al’iumtrea, unâ clasă politică măţinată di aruşfeti faţi statlu tra s-hibâ ti agudeari şi, deliberat icâ inconştientu, da cali tră aputrusearea externă, aşi cum s-feaţi tru Ucraina, adavgâ Joe Biden, alâvdândalui rolu a societatil’ei ţivilâ ti curmarea a aiştei lângoari:
Mulţâ dit arada a voastră alumtâ tră curmarea ali aruşfeti pi hiotea a chirolui şi vă hiritisescu tră gaereţli ţi li feaţitu. Cu agiutorlu a vostru, România avu amintatiţi cabaia tru alumta contra ali aruşfeti, DNA ş-amintă independenţa pân di mardzinâ, di pitricu anlu ţi tricu, 1.000 di cazuri dinintea ali justiţie. Agenţia Naţională di Integritati pitricu tru arada a l’ei cama di 6.000 di cazuri di incompatibilitati. Cadealithea că ari nica jgl’ioati ti adrari ti ndridzearea a cazurlor ama ahurhita easti faptâ cu hâiri. Nu easti ti ciudie că instituţiile antiaruşfeti suntu nai cama ghini ndreapti la capitolu pistipseari tru arada a român’ilor. Aruşfetea easti unâ problemă greauâ şi complexă tru iţi vâsilie, ama poate s-hibâ ndreaptă. Vă cândâsescu s-fâţeţ jgl’ioati ninti şi s-căftaţ a instituţiilor judiciari s-hibâ elefteri di influenţa politică, să spuneţ cu boaţi câ vârnu nu easti ma ndzeanâ di nom.”
Interlocutorl’i di Bucureşti a numirlui doi dit administraţia americană apândâsirâ dupu aştiptări. Prezidentul Traian Băsescu, cari s-lugurseaşti un garantu ti lucurlu pân di mardzinâ a DNA şi ANI, nâpoi şi spusi angajamentul mutrindalui curmarea ali auâfeti. Premierlu Victor Ponta spusi şi nâsu că guvernul ndrupaşti unâ justiţie vârtoasâ şi independentă şi cari ţi s-hibâ aţel ţi lu calcâ nomlu, cari ţi s-hibâ harea ţi u ari, lipseaşti s-da giueapi. Maşi chirolu va lu scoatâ tru migdani bânaticlu a aiştor tâxeri. Maxus tru un an electoral ţi acaţâ tru isapi euroscrutinlu di dumânică şi alidzerli prezidenţiale ti di toamnă şi tru cari actorl’ii politiţ, dependenţâ di pâradzl’i tră campanie, nu suntu multu serţâ cu orighinea a aiştor fonduri.
Armânipsearea: Taşcu Lala
