Adunarea stog ali energhie easti unâ ananghi
Adunarea stog ali energhie easti unâ dit ceareili cama cu hâiri prit cari pot s-hibâ țânuț sum cumandu pâhadzlli, dzâsi ministrul ali Energhie, Bogdan Ivan.
Tașcu Lala, 27.12.2025, 21:24
România easti activâ tu producția di energhie, ama unâ dit cripărli ți li ari easti xichea di țentri di adunari stog ali energhie artimai. Ași cum dzâc spețialișțâlli, unâ oarâ cu criștearea a ananghillei di aflari di cearei di flexibilitati a rețeauâllei, sistemili di adunari stog ali energhie tu baterii au un rol di thimelliu tu bâgarea pi zigâ a câftarillei ș-ali ofertâ ș-ti anvârtușarea a securitatillei energheticâ ali vâsilie. Ti aestu lucru, ministrul ali Energhie, Bogdan Ivan, deadi hâbarea că, tu giudețlu Cluj, fu bâgatâ pi lucru nai ma marea capațitati di adunari stog ali energhie tu baterii dit Românie – 200 megawaţi puteari. Adunarea stog easti unâ dit căiurli cama cu hâiri prit cari pot s-hibâ țânuț sum cumandu pâhadzlli ti româñi, luyurseaști Bogdan Ivan.
Tutnâoarâ, tu minduita a lui, prit aestâ metodâ s-bagâ cama pi zigâ sistemlu şi s-integreadzâ cama ghini energhia adratâ di prosumatori.
Tu unâ postari pi contul a lui di Facebook, ministrul cundille că easti zborlu di energhie chischinâ şi ieftinâ, ți easti țânutâ ta s-hibâ filisitâ atumțea cându easti ananghi. El dzâsi că investiţia Nova Power & Gas fu adratâ tu mași șasi meși, un vade șcurtu ti un proiectu ahât mari.
„Investitorilli locali investirâ tu bâgarea nanâparti ali energhie că minduescu că aoa easti clleaia ti țânearea pi zigâ ș-a pâhadzlor mșaț.ˮ, dzâsi Bogdan Ivan. Un sondaj di spețialitati deadi tu șteari că aproapea giumitati dit româñi, cama di 46,%, va s-investeascâ tu baterii ti adunarea stog ali energhi veardi, ma s-llea pâradz di la stat, anda 9% nu ştiu cari suntu hâirili a sistemilor di bâgari nanâparti ali energhie.
Uidisit cu spusa a xitâxearillei, cama di 60% dit ațelli ți apândâsirâ luyursescu că pâhălu a sistemilor di bâgari nanâparti a energhillei easti prota cheadicâ tu apofasea ta sâ-și ancupârâ și s-instaleadzâ unlu, a că numirlu aților ți au sinfer easti multu mari di cara elli minduescu că adunarea stog ali energhie veardi easti di simasie.
„Ti ațelli ți au sistemi di panouri fotovoltaiți, bateriili suntu di thimelliu câțe bagâ pi zigâ producţia variabilâ – adunâ stog energhia artimai dzuua și u silighescu dicsearâ i noaptea -, crescu autoconsumul şi scad factura, dau independenţâ şi sigurlâchi, andrupăscu rețeaua electricâ – scad supratensiunili şi agiutâ la stabilizarea a sistemlui – şi andreg yinitorlu energhetic – agiutâ la loarea parti la pâzări di flexibilitati şi serviții energhetiți mintimeni”, cundilleadzâ ațelli ți adrarâ studiului.
Vârâ 9% dit oamiñilli ți apândâsirâ dzâsirâ că nu au informaţii ti simasia și hâirili a bâgarillei di ahtări sistemi di adunari stog ali energhie electricâ cu baterii, iara ma multu di 24% dzâc că nu au un spaţiu uidisit ti instalari. Bugetlu luyursit ti un sistem complet, adrat dit panouri fotovoltaiți şi baterii, easti sum 5.000 di ivradz ti 41% dit ațelli ți luarâ parti la studiu, anda 37% adrarâ isapea ti un buget anamisa di 5.000 şi 10.000 di ivradz.
Autor: Leyla Cheamil
Apriduțearea: Mirela Biolan
