Alidzeri parlamentari – ahurheaști ampârțarea a mandatilor
S-dizvârtescu proțedurli ti adrarea a năului Parlamentu di București.
Tașcu Lala, 09.12.2024, 12:08
Năulu Leghislativu bicameralu ali Românie ți inși dupâ alidzerli ditu 1 di Andreu va ș-limbidzascâ structura. Furâ 331 di mandati di deputaț și 136 di senatori.
Proporționalu cu numirlu di voturi aprucheati, PSD, numirlu unu tu Chivernisea di tora, lipseaști s-aibâ 86 di diputaț și 36 di senatori. AUR (opoziția naționalistâ) – 63 și 28, diplo andicra di mandatili amintati aoa ș-patru añi. PNL, la puteari deadunu cu suțialu-dimucrațlli – 49 și 22. USR (tu opoziție) – 40 și 19.
Alâncescu, ti prota oarâ, pi bănțâli a Parlamentului alepțâ ditu partea ațiloru dauâ formațiuni populisti, adrati tora, ți tricurâ di praglu electoralu di ținți proțenti: SOS România va s-aibâ 28 di diputaț și 12 senatori, iara Partia a Oamiñilor Tiniri – 24 și 9.
UDMR, ți fu fârâ dânâseari, ditu 1990, tu Leghislativlu ali Românie post-comunistâ, ari tora 22 di diputaț și 10 senatori. Minoritățli etniți, alti di ațea maghiarâ, armân reprezentati tu Camera a Diputațlor di 19 politițieñi, câti unu ti cathi comunitati etnicâ.
Detaliu aproapea ti hazi, prezidentul ali Autoritati Electoralâ Permanentâ, Toni Greblă, dzâsi că, maca la ampârțarea a voturloru di duminicâ, Partia a Oamiñilor Tiniri va s-llia unu mandatu, aestu va s-hibâ traptu șcurtița anamisa di tuti alanti formaţiuni ți intrarâ tu Parlamentu. Câțe, că năua partie nu numâsi cabaia candidaţ.
Ari șapti formațiuni parlamentari, niți unâ nu angreacâ para multu ș-ari ș-multi niuidiseri anamisa di eali. Ari unu Parlamentu ma fragmentatu di cumu s-ari faptâ pânâ tu aeșțâ 20 añi di ma nâpoi, ditu cari easti zori s-iasâ unâ majoritati guvernamentalâ funcționalâ.
Fârâ s-bagâ multu mengâ la lucurlu ñicu ți li aleadzâ unâ di alantâ, presa adună AUR, SOS și POT sum numa gheneralâ di „polul suveranistu” și prognozeadzâ că nu va s-hibâ aprucheatâ niți unâ di eali tu unâ coaliție guvernamentalâ.
Armânu, cu unâ ponderi di vârâ 60% tu Parlamentu, partiili spusi pro-ivropeani. Aritmetica elementarâ easti ti unâ largâ coaliție PSD-PNL-USR-UDMR-minorităț. Ma zori easti s-treacâ di inățli ți li au unâ ti alantâ.
Di cara cumândâsirâ trei añi arada, tu numa a stabilitatillei ș-a dânâsearillei a extremismului, suțial-dimucrațlli și liberalilli s-atacarâ unu alantu, fârâ canâ zori, tu campania electoralâ ș-tora, pari că nu mata sâ strâxescu. Anamisa di userișțâ și pesedișțâ s-adunarâ, tu aproapea unu dețeniu, multâ inati și chicuseari. Iara UDMR easti multu cârtitâ di unu proiectu leghislativu a USR mutrindalui andridzearea diznău administrativâ ali vâsilie, ți va lâ ñicureadzâ a maghiarilor influența politicâ tu teritoriu. Etc…
Tora di oarâ, tutâ duñeaua pare că așteaptâ turlu ditu soni a alidzeriloru prezidențiali, ți, duminicâ, 8 di andreu, va s-facâ anamisa di independentul Călin Georgescu și șefa USR, Elena Lasconi. Uidisitu cu Constituția, șeflu a statlui easti ațelu ți numâseaști yinitorlu premieru.
Autor: Bogdan Matei
Apriduțearea: Mirela Biolan
