Andamusea B9 di București
NATO lipseaşti s’apăndăsească la azboiurli ali Rusie tru spaţlu aerian a văsiliiloru membri, tru contextulu a polimlui ditu Ucraina – easti concluzia ali andamasi B9 di București.
Tașcu Lala, 19.09.2024, 17:07
NATO lipseaşti s’da ună apandisi vărtoasă şi coordonată ti intrărli fapti ma multi ori arada a dronilor şi rachetlor ruse tru spaţlu aerian ali Alianţă, spusi ministrul român ali Apărarii, Angel Tîlvăr. La andamasea B9 di Bucureşti a miniştrilor Apărarillei ditu statili aliate di pe Flancul Estic al NATO, ufiţialu spusi că situaţia di securitate ditu reghiunea ali Amarea Lae easti găilipsitoari, di itia a fuvirserlor fapti pritu acţiunili agresive ali Rusiei, nica şi pritu dezinformari şi atacuri ţibernetiţi.
Angel Tîlvăr: “Statili B9 suntu cabaia găilipsiti tu ligătură cu azboiurli fapti multi ori arada cu dronili şi rachetili ali Federaţie Ruse tru spaţlu aerian al NATO tru Polonia, România, Letonia, ama şi ti escaladarea a tensiunilor mardzina di sinurli NATO. Ti aţea, easti ananghi ună apandisi vărtoasă şi coordonată pi livelu aliat, catacum şi băgarea tru practico căt cama ntrăoară a modelui rotaţional ali apărari aerieană şi antirachetă integrată a NATO”.
Tru contextu, ministurlu român adusi aminti și Republica Moldova cari s’ampuliseaşti cu anţăpături ditu partea ali Federaţie Rusă. Năpoi adusi aminti că easti ananghi di andrupămintu tră integrarea europeană a statlui viţinu, ună investiţie sigură, spuni ufiţialu, tră securitatea a reghiunillei ali Amarea Lae şi ali Europă.
Tu arada a lui, ministurlu agiutătoru polonez ali Apărari, Pavel Zalewsky, spusi că la yinitoarea andamasi a miniştrilor ali Apărari ditu statili aliate easti di simasie s’hibă apufusiti meatri salami di cilăstăseari tră aflarea a dronilor şi aspărdzearea a ţintiloru inamiţi.
Pavel Zalewsky: “Atumţea cându spunem că niţi un ţentimetru di teritoriu NATO nu poate s’hibă atacat di Rusia şi lipseaşti s’hibă apărat spunemu şi tră spaţlu aerian. Avumu cuvendă şi ti iniţiativi di simasie tru aestă noimă easti zborlu ti The European Sky Shield Initiative şi ti iniţiativa a Scutlui Estic. Prota mutreaşti anvărtuşearea a cooperarillei şi creastirea a finanţarillei, iara a daua spuni tră anvărtuşearea a sinurloru cu Rusia şi Belarus”.
Vinitu ñiercuri Bucureşti, ministrul ucrainean di Externe, Andrii Sybiha căftă ali Românie s’facă isapi desi ari căbili ti surparea a droniloru şi rachetiloru aruseşti ţi suntu aproapea di spaţlu aerian românescu. Tru arada ali andamasi cu omologlu Luminiţa Odobescu, aestu cundille agiutorlu tră apărarea-a independenţăllei ali Ucraina pritu apofasea ali Românie tra să-lli da un sistem Patriot.
Andrii Sybiha: “Easti un scutu nu maş tră Ucraina, ama şi tră Europa. Ti atea, aestu sistem, maxus tora că s’aproaki iarna, va nă da izini s’anvărtuşimu capacităţli a noastre di apărare. Vă plăcărsescu s’făţeţ isapi desi ari căbili ti surparea a droniloru şi rachetiloru aruseşti ţi suntu aproapea di spaţlu aerian românesc”.
Tu arada a llei, șefa diplomațiillei români năpoi adusi aminti ti andrupămintulu pănu di mardzină ali Românie tră apărarea independenţăllei, suvearanitatillei şi integritatillei teritorială ali Ucraină viţină.
Autoru: Daniela Budu
Armănipsearea: Taşcu Lala
