Andrupari ti Republica Moldova

România ş-duţi ninti lucurlu cu cari andrupaşti Republica Moldova — aţea di ma ninti vâsâlii sovieticâ, magioritar românofonâ, di cari u leagâ isturia, limba şi cultura — icâ u agiutâ cu un ampârmut di 150 di milioani di euro, ţi va s-hibâ dat nâpoi.

Corina Cristea, 14.10.2015, 12:58

România ş-duţi ninti lucurlu cu cari andrupaşti Republica Moldova — aţea di ma ninti vâsâlii sovieticâ, magioritar românofonâ, di cari u leagâ isturia, limba şi cultura — icâ u agiutâ cu un ampârmut di 150 di milioani di euro, ţi va s-hibâ dat nâpoi.

Deputaţl’ii român’i apruchiarâ, Marţâ, Achicâsearea mutrinda agiutorlu finanţiar întrâ Bucureşti şi Chişinău, iara pâradzl’ii va s-hibâ pitricuţ tu trei etapi, prota dit eali di 60 di milioani di euro, meslu ţi yini. Chirolu di dari nâpoi a ampârmutlui easti di ţinţi an’i, cu posibilitatea di turnari a lor cama ayoniea, fârâ pâltearea a vârnui comision.

Hiindalui Bucureşti tu cându s-apruchie Acordul, premierlu moldovean, Valeriu Streleţ, dzâsi că ampârmutlu pi cari România apufusi s-lu da a Republicâl’ei Moldova easti un lucru ti cari Chişinăulu s-aspuni pricunuştearea şi adâvgă că autorităţli moldoveni va s-alumtâ ca pâradzl’ii s-hibâ hârgiuţ ti alâxearea şi maxus ti modernizarea ali vâsâlii. Valeriu Streleţ: Avem baia lucri ti duţeari ninti, lipseaşti s-asiguripsim ligâturi întrâ sistemlu a nostu energetic şi sistemlu di gazi şi energii electricâ, ca energia europeanâ şi aţea româneascâ s-agiungâ la cathi cetăţean dit Republica Moldova.

Premierlu român, Victor Ponta, exiyisi că-ntreaga greau cantandisi a Republicâl’ei Moldova vini dupu reacţia ali Arusii la aspiraţiili european’i a Chişinăului: Republica Moldova ari tora anaghi di un agiutor finanţiar pi cari nu poati s-lu ia dit altuiuva — maşi di partea noastâ, ta s-treacâ di un chiro greu, pi cari, vâ dzâc io, lu treaţi maxus ti furn’iea a tu a pideapsilor di turlii icunumicâ pi cari Arusia li ari ti Moldova, maşi t-un lucru: aţel că anlu ţi tricu, vâsâlia anyrâpsi Acordul di asoţieri la Uniunea Europeanâ.

Adrarea a gazoductului Iaşi-Ungheni, programlu mutrinda amaxili di sculii, investiţiili româneşţâ di 20 di milioani di euro tu andridzearea icâ mutarea di grădiniţi, ama şi proiectul mutrinda împrustarea a sistemlui SMURD şi tu Republica Moldova suntu alti agiutoari a Bucureştiului ti Chişinău. Lipseaşti s-adrăm ş-alti căl’iuri deadun cari va s-aducâ Moldova ma aproapea di România şi ma aproapea di Europa, dzâsi premierlu moldovean. Valeriu Streleţ fu aştiptat şi di prezidentul Klaus Iohannis, cari îi deadi asiguripseri că vâsâlia viţinâ ari andruparea ali Românii.