Angarderi scoasi, angarderi ţânuti ma largu ti român’i
2013 fu anlu dit soni tru cari nâscânti stati membri ali Uniuni Europeanâ li ţânurâ restricţiile temporari pi pâzarea a lucurlui tră lucrătorl’ii român’i şi vârgari. Ama unâoarâ cu intrarea tru 2014, aesti meatri va s-hibâ scoasi tut cu tut, dupu şapte ani di la apruchearea ali României şi Vârgârie tru pareia comunitarâ. Nauă stati bâgarâ tru lucru, până tru 31 di andeu 2013, gardul tu atea ti mutreaşti izinea/ acceslu libir a românilor şi a vârgarlor pi pâzarea a lucurlui. Easti zborlu di Austria, Germania, Olanda, Luxemburg, Malta, Franţa, Marea Britanie, Irlanda şi Spania.
Leyla Cheamil, 31.12.2013, 11:45
2013 fu anlu dit soni tru cari nâscânti stati membri ali Uniuni Europeanâ li ţânurâ restricţiile temporari pi pâzarea a lucurlui tră lucrătorl’ii român’i şi vârgari. Ama unâoarâ cu intrarea tru 2014, aesti meatri va s-hibâ scoasi tut cu tut, dupu şapte ani di la apruchearea ali României şi Vârgârie tru pareia comunitarâ. Nauă stati bâgarâ tru lucru, până tru 31 di andeu 2013, gardul tu atea ti mutreaşti izinea/ acceslu libir a românilor şi a vârgarlor pi pâzarea a lucurlui. Easti zborlu di Austria, Germania, Olanda, Luxemburg, Malta, Franţa, Marea Britanie, Irlanda şi Spania.
Ama scutearea a aistor restricţii da hiri-hiri la nâscântâ di occidenttali, cari s-aspar di unâ anâpâdeari a românilor şi vârgarlor. Easti ntimil’eatâ unâ ahtari asparizmâ? Nai ma tin’isita apandisi easti că vârnu nu ştie, cundil’eadzâ România liberă. Publicaţia sumliniadză că priotlu gaile easti ligat di aşi-spuslu turismu suţial — practica ta s-ti ngrâpseşţâ ca amintâtor di agutoarili suţiali di stat tru vâsilii tru cari aesti suntu multu filotimi, cata cum Germania icâ Marea Britanie, iu eali nâstrec cu multu amintatiţli di mesi dit România. Ari multi pirmituseri ţi cârtescu, aduţi aminti jurnalu, ngrâpsiti tru tabloidi, ti imigranţâl’i dit România, di arada romi, cari s-ufilisescu di sistemili suţiale dit vâsiliili europeani, ama numirlu a aiştor profitori easti relativ n’ic.
Dimec, tra s-nu s-agiungâ la câlcarea a nomlui cu sistemlu di hâirlâtiţi suţiali tru Marea Britanie, premierlu David Cameron spusi, tora ayon’ia, unâ dalgâ di meatri tu aestâ noimâ. Aşi, di la 1 yinar, atel’i ţi caftâ locuri di lucru dit Uniunea Europeană numata va s-poatâ s-caftâ agiutoare di şomaj tu proţl’i trei meşi di sejur tru Marea Britanie. Ma multu, şomerl’ii european’i nu mata va s-l’ia alocaţii ti casâ, cari ţi s-hibâ dzuua anda vinirâ tru Marea Britanie. Cotidianlu britanic The Telegraph lugurseaşti, ama, că probabilitatea câ imigranţâl’ii dit UE s-bâneadzâ dit agiutoare easti multu ma n’ică andicra di aţea ca inşişi cetăţean’il’i britanit s-hibâ tu unâ ahtari situaţie.
Publicaţia cundil’eadzâ ti libira urdinari a mânâl’ei di lucru tru şingirlu comunitar, cari easti acutotalui hâirlâticâ tră Marea Britanie şi Europa, ti furn’ia câ duţi la unâ ufiliseari hâirlâticâ a capitalui uminescu. Si Diutsche Welle aproachi că Germania, cari ari ananghi di mână di lucru calificată, ari di multu chiro ti amintaticu cu vinita a lucrătorlor român’i icâ vârgari, yiaţrâ, ingineri icâ tehnicieni.
Tu arada a lui, cotidianlu francez Le Mondi lugurseaşti pţân probabilă perspectiva a unâl’ei dalgâ babageanâ di imigranţâ dit Europa dit apiritâ cătră Franţa şi alti vâsilii ali UE di la 1 yinar. Publicaţia aleadzi dit spusili a specialiştilor ţi lugursescu că dauă miliun’i di români fudzirâ tru vâsilii dit Europa di sud, maxus Spania şi Italia, şi maşi puţân’i di el’i va ş-alasâ, vahi, prota vâsilie-nicuchiră.
Autor: Leyla Cheamil
Armânipsearea: Taşcu Lala
